ភ្នំពេញ៖ គម្រោង «សួនកែច្នៃកាកសំណល់នៅរាជធានីភ្នំពេញ-ការជ្រើសរើសបច្ចេកវិទ្យាសម្រាប់ប្រព្រឹត្តកម្មសំណល់រឹងក្នុងទីក្រុង និងការផលិតថាមពល» នឹងបំប្លែងកាកសំណល់ទៅជាអគ្គិសនី ដើម្បីបង្កើតថាមពលស្អាត និងតម្លៃសមរម្យ។ នេះជាការបញ្ជាក់របស់ក្រុមហ៊ុន Vinci Construction និងក្រុមហ៊ុន Sage Engineering ដែលបានសិក្សាលើគម្រោងខាងលើ។

ក្នុងជំនួបជាមួយក្រុមប្រឹក្សាអភិវឌ្ឍន៍កម្ពុជា ក្រុមហ៊ុនទាំងពីរ ដែលបានសហការសិក្សាគម្រោងនេះ បានបញ្ជាក់ពីវត្ថុបំណងថា គម្រោងនេះ នឹងបង្កើនអាយុកាលនៃទីលានចាក់សំរាម, លើកកម្ពស់សុខភាព និងសុខុមាលភាពរបស់ប្រជាពលរដ្ឋ, លើកកម្ពស់វិស័យឧស្សាហកម្ម នវានុវត្តន៍ និងហេដ្ឋារចនាសម្ព័ន្ធពាក់ព័ន្ធ តាមរយៈការសាងសង់រោងចក្រកែច្នៃកាកសំណល់រឹង ជាមួយនឹងបច្ចេកវិទ្យាចុងក្រោយ និងពង្រឹងការគ្រប់គ្រងថ្លៃដើមក្នុងការកែច្នៃកាកសំណល់ក្នុងទីក្រុង។

ក្នុងជំនួបកាលពីថ្ងៃទី៣ ខែមីនា ឆ្នាំ២០២៥នេះ អ្នកជំនាញ ក៏បានបង្ហាញអំពីព័ត៌មាន ជាអាទិ៍៖ ទិន្នន័យពាក់ព័ន្ធដែលប្រមូលបាន, បច្ចុប្បន្នភាពនៃការសិក្សាគម្រោង និងបច្ចេកវិទ្យាពាក់ព័ន្ធនានាសម្រាប់ការធ្វើប្រព្រឹត្តកម្មសំណល់រឹង និងបំប្លែងជាថាមពលសម្រាប់ប្រើប្រាស់បន្ត៕