ភ្នំពេញ៖ ស្ថានទូតអូស្ត្រាលី ធនាគារពិភពលោក គណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប.) និងអង្គការទស្សនៈពិភពលោកអន្តរជាតិនៅកម្ពុជា (WVI-C) បានប្រកាសបន្ថែមថវិកា សម្រាប់បន្តរយៈពេលនៃការអនុវត្តគម្រោងគណនេយ្យភាពសង្គម (ISAF) ដំណាក់កាលទី២ ដែលបានចាប់ផ្តើមពីឆ្នាំ២០២១រហូតដល់ឆ្នាំ២០២៣។

ការផ្តល់បន្ថែមនូវថវិកាចំនួន ១៥លានដុល្លាអូស្រ្តាលី ដល់គម្រោងគណនេយ្យភាពសង្គម ដំណាក់កាលទី២ នេះ ស្ថានទូតអូស្រាលីប្រចាំនៅកម្ពុជា បានឱ្យដឹងកាលពីថ្ងៃទី០៥ ខែធ្នូ ឆ្នាំ២០២៣ ថា ដើម្បីធ្វើឱ្យប្រសើរឡើងនូវការផ្តល់សេវាសាធារណៈ តាមរយៈការពង្រឹងនូវតម្លាភាព បង្កើនការចូលរួមរបស់ប្រជាពលរដ្ឋ និងសកម្មភាពឆ្លើយតប ដែលស្របតាមអាទិភាពរបស់រាជរដ្ឋាភិបាលកម្ពុជា ក្រោមកម្មវិធីជាតិសម្រាប់ការអភិវឌ្ឍន៍តាមបែបប្រជាធិបតេយ្យនៅថ្នាក់ក្រោមជាតិ ដំណាក់កាលទី២ ឆ្នាំ២០២១-២០៣០។

ស្ថានទូអូស្រាលី បានបញ្ជាក់ថា គម្រោងដំណាក់កាលទី២នេះ នឹងធ្វើឱ្យប្រសើរឡើងនូវសេវាសាធារណៈ ក្នុងឃុំគោលដៅសរុបចំនួន ១០៤៣ សាលាបឋមសិក្សាចំនួន ៤៦៣៣ និងមណ្ឌលសុខភាពចំនួន ៨២៦ ដែលនឹងផ្តល់អត្ថប្រយោជន៍ដល់ប្រជាជនកម្ពុជាជាង ៥ លាននាក់នៅត្រឹមឆ្នាំ២០២៥។ គម្រោងនេះ ក៏នឹងបន្តបង្កើនទំនាក់ទំនងរវាងអ្នកផ្តល់សេវាសាធារណៈ និងអ្នកទទួលសេវាសាធារណៈ ដើម្បីធ្វើឱ្យប្រសើរឡើងនូវការផ្តល់សេវាសាធារណៈ ព្រមទាំងជួយឱ្យប្រជាជនកម្ពុជាទាំងអស់អាចមានលទ្ធភាពទទួលបានសេវាសាធារណៈ៕