ភ្នំពេញ៖ កិច្ចប្រជុំក្រុមការងារផ្នែកឯកជន ក្រុម «ឈ» ផ្នែកស្រូវអង្ករ នៃវេទិការាជរដ្ឋាភិបាល-ផ្នែកឯកជន ពិភាក្សាពីបញ្ហាប្រឈម ដែលជាកង្វល់របស់ផ្នែកឯកជនក្នុងវិស័យស្រូវ និងអង្ករ រួមមានការលើកទឹកចិត្តផ្នែកពន្ធដារចំពោះវិស័យស្រូវអង្ករ ដើម្បីដាក់ស្នើសុំដំណោះស្រាយពីសំណាក់ដៃគូ គឺក្រសួងកសិកម្ម រុក្ខាប្រមាញ់ និងនេសាទ។

ក្នុងកិច្ចពិភាក្សា កាលថ្ងៃទី២៥ ខែកុម្ភៈ ឆ្នាំ២០២៥ ដែលដឹកនាំដោយ ឧកញ៉ា ចាន់ សុឃាំង សហប្រធានក្រុមការងារ «ឈ» ផ្នែកឯកជន ក៏បានពិភាក្សាពីបញ្ហាការផ្គត់ផ្គង់ថាមពល និងថាមពលប្រើប្រាស់ឡើងវិញ, កម្រិតកាឌីញាអង្ករនៅកម្ពុជា, បញ្ហាថ្នាំពុលកសិកម្ម និងបញ្ហាពូជស្រូវ រួមនិងបញ្ហាប្រឈមមួយចំនួនទៀតផងដែរ។

កិច្ចប្រជុំក្រុមការងារផ្នែកឯកជននេះ ដែលជាលើកដំបូងនៃឆ្នាំ២០២៥ នេះ មានការមានការចូលរួមពីសំណាក់អនុសហប្រធានក្រុមការងារ «ឈ» ផ្នែកឯកជន, ក្រុមការងារសហព័ន្ធស្រូវអង្ករ, តំណាងសមាគមភស្តុភារកម្មកម្ពុជា, តំណាងសមាគមវិនិយោគិនកម្ពុជា តំណាងរោងម៉ាស៊ីនកិនស្រូវឯកជន និងសមាជិក សមាជិកានៃក្រុមការងារ «ឈ» ផ្នែកឯកជនមួយចំនួនទៀតផងដែរ៕