ភ្នំពេញ៖ សម្តេចធិបតី ហ៊ុន ម៉ាណែត នឹងដឹកនាំគណៈប្រតិភូជាន់ខ្ពស់ចូលរួមកិច្ចប្រជុំប្រចាំឆ្នាំលើកទី៥៤ នៃវេទិកាសេដ្ឋកិច្ចពិភពលោកក្រោមមូលបទ«ការកសាងឡើងវិញនូវទំនុកចិត្ត» នៅថ្ងៃទី១៦-១៧ ខែមករា ឆ្នាំ២០២៤ នៅទីក្រុងដាវ៉ូស-ក្លូស្វ័រ ប្រទេសស្វីស។

បើតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ នាថ្ងៃទី១២មករា កិច្ចប្រជុំនេះ ផ្តោតលើគោលការណ៍ជាមូលដ្ឋានដែលជំរុញឱ្យមានទំនុកចិត្ត តម្លាភាព សង្គតិភាព និងគណនេយ្យភាព។ ក្នុងវេទិកានោះ សម្តេចធិបតីនាយករដ្ឋមន្រ្តី នឹងអញ្ជើញចូលរួមថ្លែងបទអន្តរាគមន៍ក្រៅផ្លូវការជាមួយថ្នាក់ដឹកនាំសេដ្ឋកិច្ចពិភពលោក ដោយផ្តោតលើប្រធានបទ«ការស្តារទំនុកចិត្តលើប្រព័ន្ធសកលលោកឡើងវិញ»។

ប្រមុខរាជរដ្ឋាភិបាលកម្ពុជា លើកយកប្រធានបទនេះថ្លែងក្រៅផ្លូវការជាមួយថ្នាក់ដឹកនាំសេដ្ឋកិច្ច ក្នុងន័យស្វែងរកវិធីសាស្ត្រឈ្នះ-ឈ្នះ ដើម្បីដោះស្រាយបញ្ហាប្រឈម ដែលជាក្តីបារម្ភរបស់សកលលោកនាពេលបច្ចុប្បន្ន និងលើកកម្ពស់ការចូលរួមកិច្ចសន្ទនាដោយសន្តិវិធីក្នុងការកសាងទំនុកចិត្តទៅវិញទៅមក សម្រាប់កិច្ចសហប្រតិបត្តិការប្រកបដោយប្រសិទ្ធភាព។

ក្នុងឱកាសចូលរួមវេទិកាខាងលើសម្ដេចធិបតី ហ៊ុន ម៉ាណែត នឹងមានជំនួបជាមួយ ឯកឧត្តម Mathias Cormann អគ្គលេខាធិការនៃអង្គការសហប្រតិបត្តិការសេដ្ឋកិច្ច និងអភិវឌ្ឍន៍ (OECD) ព្រមទាំង

ធុរជននៃក្រុមហ៊ុនឈានមុខមួយចំនួន ដើម្បីទាក់ទាញការវិនិយោគមកកម្ពុជាផងដែរ។ គួរបញ្ជាក់ថា ក្នុងកិច្ចប្រជុំនេះ នឹងមានការចូលរួមពីថ្នាក់ដឹកនាំពិភពលោក នាយកប្រតិបត្តិក្រុមហ៊ុនធំៗ ប្រធានអង្គការអន្តរជាតិសំខាន់ៗ ថ្នាក់ដឹកនាំសង្គមស៊ីវិល តំណាងយុវជន សហគ្រិនសង្គម និងអង្គភាពសារព័ត៌មាននានា៕