ភ្នំពេញ៖ ក្រសួងទេសចរណ៍កម្ពុជា និងក្រសួងវប្បធម៌ និងទេសចរណ៍របស់ចិន នឹងរៀបចំព្រឹត្តិការណ៍បិទ «ឆ្នាំនៃការផ្លាស់ប្តូរប្រជាជននិងប្រជាជន កម្ពុជា-ចិន ២០២៤» នៅទីក្រុងបឹងចូវ ខេត្តហឺណាន ប្រទេសចិន។ ព្រឹត្តិការណ៍នេះ នឹងមានការសម្តែងសិល្បៈថ្នាក់ជាតិរួមគ្នា ដូចជាក្បាច់គុនល្បុក្កតោកម្ពុជា និងក្បាច់គុនកុង ហ្វូសៅលីញ ព្រមទាំងការបង្ហាញម៉ូតសម្លៀកបំពាក់បុរាណ និងប្រពៃណីកម្ពុជា-ចិន។

កម្មវិធីខាងលើ ដែលនឹងប្រព្រឹត្តទៅចាប់ពីថ្ងៃទី២៤ ដល់ថ្ងៃទី២៥ ខែកុម្ភៈ ឆ្នាំ២០២៥ នឹងលើកកម្ពស់វិស័យទេសចរណ៍កម្ពុជា-ចិន ក៏ដូចជាជំរុញការផ្សព្វផ្សាយកិត្យានុភាពកម្ពុជា សិល្បៈវប្បធម៌ សក្តានុពលទេសចរណ៍ ឱ្យកាន់តែទូលំទូលាយលើទីផ្សារអន្តរជាតិពិសេសទីផ្សារចិន។ បើតាមសេចក្តីជូនដំណឹង របស់ក្រសួងទេសចរណ៍ ព្រឹត្តិការណ៍នេះផងដែរ នឹងក្លាយជាឱកាសផ្សារភ្ជាប់ និងពង្រីកទំនាក់ទំនងរវាងប្រជាជននិងប្រជាជន ទំនាក់ទំនងពាណិជ្ជកម្ម ពង្រឹងភាពជាដៃគូ និងកិច្ចសហការរួមចំណែកកសាង «សហគមន៍ជោគវាសនារួមកម្ពុជា-ចិន» និងដើម្បីជាការបន្តគាំទ្រ ដល់កិច្ចសហប្រតិបត្តិការត្បូងពេជ្រ កម្ពុជា-ចិន។

ក្រសួងទេសចរណ៍ អំពាវនាវដល់សមាគមទេសចរណ៍ ប្រតិបត្តិករទេសចរណ៍ ផ្នែករដ្ឋ-ឯកជន សារព័ត៌មានជាតិ-អន្តរជាតិ សាធារណជន និងគ្រប់ភាគីពាក់ព័ន្ធ ចូលរួមផ្សព្វផ្សាយពិធីបិទ «ឆ្នាំនៃការផ្លាស់ប្តូរប្រជាជននិងប្រជាជន កម្ពុជា-ចិន ២០២៤» ឱ្យបានទូលំទូលាយ។ សម្រាប់ព័ត៌មានបន្ថែម សាធារណជន អាចទំនាក់ទំនងតាមរយៈទូរសព្ទលេខ +៨៥៥ ៩៦ ២៦៥ ៥៥៥៥ ឬ +៨៥៥ ៩៣ ៩៣៣ ៩៨២ និង Email: [email protected] / [email protected]/tt ៕