ភ្នំពេញ៖ ធនាគារជាតិនៃកម្ពុជា និងធនាគាររដ្ឋវៀតណាម បានប្រកាសដាក់ឱ្យដំណើរការការទូទាត់ឆ្លងដែនតាមរយៈឃ្យូអរកូត (QR Code) រវាងគ្នា នៅថ្ងៃទី០៣ ខែធ្នូ ឆ្នាំ២០២៣ នាខេត្តសៀមរាប។ ការដាក់ឱ្យប្រើប្រាស់ជាផ្លូវការនេះធ្វើឡើងក្នុងកិច្ចប្រជុំទ្វេភាគីរវាងធនាគារកណ្តាលទាំងពីរ ដើម្បីពង្រឹងរឹតចំណងមិត្តភាព និងកិច្ចសហប្រតិបត្តិការជាមួយគ្នា។

ការដាក់ឱ្យដំណើរការការទូទាត់ឆ្លងដែនតាមរយៈ QR Code នេះ លោកជំទាវបណ្ឌិត ជា សិរី បញ្ជាក់ថា ដើម្បីជំរុញការទូទាត់ឌីជីថល ជួយលើកកម្ពស់ការប្រើប្រាស់រូបិយវត្ថុជាតិក្នុងទីផ្សារ ប្រកបដោយភាពងាយស្រួល ឆាប់រហ័ស តម្លៃសមរម្យ សុវត្ថិភាព និងជួយជំរុញកំណើនសេដ្ឋកិច្ច ទេសចរណ៍ និងពាណិជ្ជកម្មឆ្លងដែនរវាងកម្ពុជា និងវៀតណាម។

ពិធីប្រកាសដាក់ឱ្យប្រើប្រាស់ QR Code ទូទាត់ឆ្លងដែននេះ ក្រោមវត្តមានលោកជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជា និងលោកជំទាវ Nguyen Thi Hong ទេសាភិបាល ធនាគាររដ្ឋវៀតណាម៕