ភ្នំពេញ៖ ក្រសួងទេសចរណ៍ និងមជ្ឈមណ្ឌលអាស៊ាន-កូរ៉េ (AKC) នឹងរួមគ្នាជំរុញវិនិយោគិនកូរ៉េមកវិនិយោគលើវិស័យទេសចរណ៍កម្ពុជា។ នេះបើតាមកិច្ចពិភាក្សារបស់ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និងឯកឧត្តម KIM JAE-SHIN អគ្គលេខាធិការនៃមជ្ឈមណ្ឌលអាស៊ាន-កូរ៉េ កាលពីថ្ងៃទី១៩ ខែមករា ឆ្នាំ២០២៥ នៅទីក្រុងចូហូ ប្រទេសម៉ាឡេស៊ី។

ក្នុងកិច្ចពិភាក្សាការងារអំពីកិច្ចសហប្រតិបត្តិការនេះ ភាគីទាំងពីរ ក៏បានពិភាក្សាផ្តោតលើការផ្សព្វផ្សាយទេសចរណ៍កម្ពុជាតាមបណ្ដាញផ្សព្វផ្សាយកូរ៉េ, បង្កើនជើងហោះហើរត្រង់ពីកូរ៉េមកកម្ពុជា, បណ្តុះបណ្តាលធនធានមនុស្សក្នុងវិស័យទេសចរណ៍, ពង្រឹងសមត្ថភាពមគ្គុទ្ទេសក៍ និងប្រតិបត្តិករទេសចរណ៍ ព្រមទាំងការផ្លាស់ប្តូរដំណើរទស្សនកិច្ចសិក្សាស្វែងយល់ (FAM Trip)៕