ភ្នំពេញ៖ កម្ពុជា-ហ្វីលីពីន នឹងជំរុញការតភ្ជាប់ជើងហោះហើរត្រង់បន្ថែមទៀតរវាងគោលដៅទេសចរណ៍សំខាន់ៗនៃប្រទេសទាំងពីរ។ នេះបើតាមការពិភាក្សារវាងឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ ជាមួយលោកជំទាវ MA. ESPERANZA CHRISTINA GARCIA FRASCO រដ្ឋមន្ត្រីទេសចរណ៍ហ្វីលីពីន កាលពីថ្ងៃទី២០ ខែមករា ឆ្នាំ២០២៥។

នៅក្នុងកិច្ចពិភាក្សានេះ ឯកឧត្តម ហួត ហាក់ និងលោកជំទាវ MA. ESPERANZA CHRISTINA GARCIA FRASCO ក៏បានឯកភាពគ្នាជំរុញការរៀបចំកិច្ចប្រជុំក្រុមការងារទេសចរណ៍រួម ស្តីពីកិច្ចសហប្រតិបត្តិការទេសចរណ៍កម្ពុជា-ហ្វីលីពីនក្នុងពេលដ៏ខ្លីខាងមុខនេះផងដែរ។

ជាមួយគ្នានេះ កម្ពុជា-ហ្វីលីពីន ក៏បានពិនិត្យលើកម្មវិធីអនុវត្តអនុស្សរណៈយោគយល់គ្នា ដើម្បីពន្លឿនការចុះហត្ថលេខាលើកម្មវិធីអនុវត្តអនុស្សរណៈយោគយល់គ្នានេះក្នុងពេលដ៏ឆាប់ខាងមុខ។ គួរបញ្ជាក់ថា ក្នុងជំនួបភាគីទាំងពីរ គឺដើម្បីពិភាក្សាលើការជំរុញកិច្ចសហប្រតិបត្តិការទេសចរណ៍រវាងកម្ពុជា-ហ្វីលីពីន៕