ភ្នំពេញ៖ ធនាគារស្ថាបនា ភីអិលស៊ី មានផែនការពង្រីកផលិតផលហិរញ្ញវត្ថុឌីជីថល និងប្រតិបត្តិការហិរញ្ញវត្ថុឱ្យកាន់តែទូលំទូលាយបន្ថែមទៀតនៅកម្ពុជា។ នេះបើតាមការលើកឡើងរបស់ លោក Hendrik Gezienus MULDER ប្រធាននាយកប្រតិបត្តិធនាគារស្ថាបនា ក្នុងជំនួបពិភាក្សាជាមួយ លោកជំទាវបណ្ឌិតជា សិរី ទេសាភិបាលធនាគារជាតិនៃកម្ពុជា។

ក្នុងជំនួប ដែលធ្វើឡើងកាលពីថ្ងៃទី១៤ ខែមករា ឆ្នាំ២០២៥ នៅធនាគារជាតិនៃកម្ពុជា អគារវត្តភ្នំ លោក Hendrik Gezienus MULDER បានលើកឡើងអំពីស្ថានភាពប្រតិបត្តិការរបស់ធនាគារស្ថាបនា ស្ថានភាពគុណភាពឥណទាន និងផែនការយុទ្ធសាស្រ្តអាជីវកម្ម ព្រមទាំងបានលើកឡើងពីសុទិដ្ឋិនិយមចំពោះស្ថានភាពសេដ្ឋកិច្ចនៅកម្ពុជា។

លោកជំទាវបណ្ឌិត ជា សិរី បានជំរុញឱ្យធនាគារស្ថាបនា បង្កើនការគាំទ្រដល់សហគ្រាសធុនតូច និងមធ្យម (SMEs) ឱ្យបានទូលំទូលាយបន្ថែមទៀត និងឱ្យធនាគារនេះបន្តពង្រឹងការអនុវត្តនិរន្តរភាពអាជីវកម្ម និងគោលការណ៍គាំពារអតិថិជនឱ្យបានកាន់តែប្រសើរ។ ជាមួយគ្នានេះ លោកជំទាវបណ្ឌិត ជា សិរី ក៏បានលើកឡើងពីយន្តការដំណោះស្រាយរបស់ស្ថាប័នរដ្ឋាភិបាល ចំពោះវិស័យអចលនទ្រព្យ និងបានលើកទឹកចិត្តដល់គ្រឹះស្ថានធនាគារ និងហិរញ្ញវត្ថុ ចូលរួមសហការក្នុងយន្តការនេះ៕