ភ្នំពេញ៖ កម្ពុជា ត្រូវការហិរញ្ញវត្ថុចំនួន ៨ប៊ីលានដុល្លា ឬ ៨ពាន់លានដុល្លារ ដើម្បីសម្រេចបានគោលដៅសេដ្ឋកិច្ចបៃតង។ នេះជាការលើកឡើងរបស់លោកជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជា ក្នុងកិច្ចប្រជុំបើកកិច្ចពិភាក្សារបស់ក្រុមការងារហិរញ្ញវត្ថុបៃតងអន្តរក្រសួង កាលពីថ្ងៃទី០៨ ខែមករា ឆ្នាំ២០២៥។

ក្នុងកិច្ចប្រជុំលើកទី១ របស់ក្រុមការងារអន្តរក្រសួងដើម្បីពិគ្រោះយោបល់លើការងារហិរញ្ញវត្ថុបៃតង លោកជំទាវបណ្ឌិត ជា សិរី បានបន្តថា ទំហំថវិការមួយចំនួនធំ គឺទាមទារការចូលរួមពីគ្រប់ភាគីពាក់ព័ន្ធ ទាំងរដ្ឋាភិបាល វិស័យឯកជន ដៃគូអភិវឌ្ឍន៍ និងសប្បុរសជននានា ដូច្នេះការណ៍នេះ ទាមទារឱ្យកម្ពុជាមាន ចក្ខុវិស័យ និងយុទ្ធសាស្រ្តច្បាស់លាស់ដើម្បីកៀរគរហិរញ្ញវត្ថុចាំបាច់។

កិច្ចប្រជុំក្រុមការងារអន្តរក្រសួងនេះ មានគោលបំណងចែករំលែក បច្ចុប្បន្នភាពនៃយុទ្ធសាស្រ្ត ផែនការសកម្មភាព និងគំនិតផ្តួចផ្តើមនានារបស់រាជរដ្ឋាភិបាល ប្រមូលធាតុចូលបន្ថែមលើការអភិវឌ្ឍផែនទីមគ្គុទ្ទេសក៍ហិរញ្ញវត្ថុប្រកបដោយចីរភាពរបស់កម្ពុជា លើប្រព័ន្ធវដ្តករសាស្រ្តស្តីពីហិរញ្ញវត្ថុបៃតងនៅកម្ពុជា និងលើដំណើរការរៀបចំមុខងារនិងភារកិច្ចរបស់ក្រុមការងារហិរញ្ញវត្ថុបៃតងអន្តរក្រសួង៕