ភ្នំពេញ៖ ការធ្វើបច្ចុប្បន្នភាពចំណេះដឹងពាក់ព័ន្ធនឹងច្បាប់ និងលិខិតបទដ្ឋានគតិយុត្តស្តីពីពន្ធដារ មានសារសំខាន់មិនអាចខ្វះបាន ដើម្បីចូលរួមផ្សព្វផ្សាយចំណេះដឹងស្តីពីពន្ធដារ ក៏ដូចជាវប្បធម៌នៃការបង់ពន្ធ ក្នុងការគាំទ្រដល់ការកៀរគរចំណូលរបស់អគ្គនាយកដ្ឋានពន្ធដារ ក្នុងគោលដៅបង្កើនចំណូលថវិការដ្ឋ និងរក្សាកំណើនសេដ្ឋកិច្ច។ នេះបើតាមការលើកឡើងរបស់ លោក ស៊ុន វុទ្ធី នាយកសាលាជាតិពន្ធដារ នៃអគ្គនាយកដ្ឋានពន្ធដារ។

ក្នុងកិច្ចប្រជុំស្តីពី កិច្ចប្រជុំស្តីពី«ការពង្រឹងសមត្ថភាពគ្រូបង្រៀនមុខវិជ្ជាពន្ធដារ នៅតាមគ្រឹះស្ថានឧត្តមសិក្សា» កាលពីថ្ងៃទី២០ ខែធ្នូ ឆ្នាំ២០២៤ រវាងសាលាជាតិពន្ធដារ នៃអគ្គនាយកដ្ឋានពន្ធដារ និងសមាគមគ្រឹះស្ថានឧត្តមសិក្សាកម្ពុជា សាលាជាតិពន្ធដារនៃអគ្គនាយកដ្ឋានពន្ធដារសហការជាមួយគ្រឹះស្ថានឧត្តមសិក្សា លោក ស៊ុន វុទ្ធី លើកឡើងថា កិច្ចពិភាក្សានេះ មានគោលបំណងបង្កើនភាពជាដៃគូ ក្នុងការបង្រៀន បណ្តុះបណ្តាល និងផ្សព្វផ្សាយអំពីពន្ធដារ នៅតាមគ្រឹះស្ថានឧត្តមសិក្សានៅកម្ពុជា។ លោក ស៊ុន វុទ្ធី បន្ថែមថា ការយកចិត្តទុកដាក់ពីអគ្គនាយកដ្ឋានពន្ធដារ ក្នុងការអនុវត្តភាពជាដៃគូជាមួយគ្រឹះស្ថានឧត្តមសិក្សាលើវិស័យអប់រំ គឺស្របទៅតាមយុទ្ធសាស្រ្តបញ្ចកោណ ដំណាក់កាលទី១ របស់រាជរដ្ឋាភិបាល នីតិកាលទី៧ នៃរដ្ឋសភា។

ឯកឧត្តមបណ្ឌិត ហេង វ៉ាន់ដា ប្រធានសមាគមគ្រឹះស្ថានឧត្តមសិក្សាកម្ពុជា ក៏បានថ្លែងអំណរគុណដល់អគ្គនាយកដ្ឋានពន្ធដារ ដែលធ្វើឱ្យការប្រមូលពន្ធដារមានកំណើន តាមរយៈការធ្វើកំណែទម្រង់របស់អគ្គនាយកដ្ឋានពន្ធដារ។ ឯកឧត្តមបណ្ឌិត ហេង វ៉ាន់ដា បានលើកឡើងពីសារសំខាន់ក្នុងការសហការគ្នារវាងអគ្គនាយកដ្ឋានពន្ធដារ និងគ្រឹះស្ថានឧត្តមសិក្សា ដែលទាំងនេះនឹងជំរុញឱ្យមានការបង្រៀន បកស្រាយ និងអនុញ្ញាតឱ្យស្ថាប័នទាំងពីរចូលរួមផ្សព្វផ្សាយ បណ្តុះបណ្តាលច្បាប់ និងលិខិតបទដ្ឋានគតិយុត្តិពន្ធដារថ្មីៗ ដែលអាចបង្កើនការយល់ដឹងពីវប្បធ៌មនៃការបង់ពន្ធ ដល់សិស្ស-និស្សិត គ្រូ និងសាធារណជន ក្នុងគោលបំណងរក្សាវប្បធម៌បង់ពន្ធ៕