ភ្នំពេញ៖ ឧកញ៉ា គួច ផេង អនុប្រធានសភាពាណិជ្ជកម្មកម្ពុជា លើកទឹកចិត្តឱ្យវិនិយោគិនតួគីយេ មកបណ្តាក់ទុនវិនិយោគនៅកម្ពុជា ដើម្បីអាចនាំចេញផលិតផលជាមួយអត្រាពន្ធគយទាប ទៅកាន់ទីផ្សារថ្មីៗ តាមរយៈកិច្ចព្រមព្រៀងពាណិជ្ជកម្មសេរីពហុភាគី និងទ្វេភាគី របស់កម្ពុជា។ ឧកញ៉ា គួច ផេង ជំរុញដូច្នេះ ក្នុងវេទិកាធុរកិច្ចកម្ពុជា-តួគីយេ កាលពីថ្ងៃទី១២ ខែធ្នូ ឆ្នាំ២០២៤។

ឧកញ៉ា គួច ផេង លើកឡើងថា កម្ពុជា មានសេដ្ឋកិច្ចរីកចម្រើនឆាប់រហ័ស, គោលនយោបាយលើកទឹកចិត្ត និងមានទីផ្សារទូលំទូលាយនៅទូទាំងពិភពលោក។ ក្នុងវេទិកានោះដែរ ឧកញ៉ា គួច ផេង បានបញ្ជាក់ថា កម្ពុជា និងតួគីយេ អាចបង្កើនពាណិជ្ជកម្ម និងវិនិយោគរវាងប្រទេសទាំងពីរ និងបានរំលេចពីកាលានុវត្តភាពធុរកិច្ចលើវិស័យសំខាន់ៗ ដែលធុរជនប្រទេសទាំងពីរ អាចសហការគ្នាបាន ដូចជាវិស័យកសិកម្ម ទេសចរណ៍ ថាមពល សំណង់ និងបច្ចេកវិទ្យា។

វេទិកាធុរកិច្ចកម្ពុជា-តួគីយេ សហការរៀបចំដោយសភាពាណិជ្ជកម្មកម្ពុជា សភាពាណិជ្ជឧស្សាហកម្ម និង គណៈកម្មាធិការទំនាក់ទំនងសេដ្ឋកិច្ចបរទេសតួកគី(DEiK)។ វេទិកាធុរកិច្ចនេះ មានការចូលរួមពីតំណាងស្ថាប័នរដ្ឋាភិបាលតួកគី និងធុរជនតួគីយេនិងកម្ពុជា ជួបគ្នាពិភាក្សាអំពីសក្តានុពលប្រទេសទាំងពីរ ស្វែងរកកាលានុវត្តភាពវិនិយោគ និងពង្រឹងទំនាក់ទំនងធុរកិច្ច៕