ភ្នំពេញ៖ សមាគមសណ្ឋាគារ បានចុះអនុស្សរណៈនៃការយោគយល់គ្នា (MOU) ជាមួយសមាគមសហព័ន្ធស្វាយចន្ទី និងសមាគមស្វាយចន្ទី នាថ្ងៃទី១០ ខែធ្នូ ឆ្នាំ២០២៤។ តាមរយៈកិច្ចសហការនេះ សមាគមសណ្ឋាគារ នឹងទិញស្វាយចន្ទី ២៥០តោន/ឆ្នាំ រយៈពេល ៣ឆ្នាំ ក្នុងនោះ ២១០តោន សម្រាប់កែច្នៃធ្វើម្ហូបអាហារ នំ និងភេសជ្ជៈ និង ៤០តោន នឹងផលិតជាស្វាយចន្ទីវេចខ្ចប់ដាក់លក់ក្នុងមីនីបារ និងក្នុងបន្ទប់សណ្ឋាគារ។

ការចុះ MOU ស្តីពី «កិច្ចសហប្រតិបត្តិការជំរុញការប្រើប្រាស់ផលិតផលស្វាយចន្ទីកម្ពុជា» ដែលធ្វើឡើងក្រោមអធិបតីភាព លោកជំទាវ ចម និម្មល រដ្ឋមន្រ្តីក្រសួងពាណិជ្ជកម្ម នៅទីស្តីការក្រសួងពាណិជ្ជកម្មនេះ មានគោលបំណងជំរុញការប្រើប្រាស់ផលិតផលស្វាយចន្ទីក្នុងវិស័យសណ្ឋាគារ ដើម្បីលើកកម្ពស់ការកែច្នៃ ការប្រើប្រាស់ និងចែកចាយផលិតផលស្វាយចន្ទីនៅកម្ពុជា។

គួរបញ្ជាក់ថា ក្នុងពិធីខាងលើ ក៏មានការចូលរួមពីថ្នាក់ដឹកនាំ និងមន្ត្រីពាក់ព័ន្ធរបស់ក្រសួងពាណិជ្ជកម្ម ថ្នាក់ដឹកនាំសមាគមសណ្ឋាគារកម្ពុជា សមាគមសហព័ន្ធស្វាយចន្ទីកម្ពុជា សមាគមស្វាយចន្ទីកម្ពុជា ផ្សារទំនើប ម៉ាត និងសហគ្រាសស្វាយចន្ទីជាច្រើនរូបផងដែរ។ នេះបើតាមការចុះផ្សាយរបស់ក្រសួងពាណិជ្ជកម្ម នាថ្ងៃទី១០ ខែធ្នូ ឆ្នាំ២០២៤៕