ភ្នំពេញ៖ គម្រោងវិនិយោគ និងធុរកិច្ចចំនួន៤៨ រួមមាន៖ គម្រោងពាក់ព័ន្ធនឹងអគារជាប់គាំងចំនួន១៦, គម្រោងថ្មីចំនួន២៨ និងការពង្រីកគម្រោងចំនួន៤ ដែលមានទុនវិនិយោគសរុប ៤៨៧លានដុល្លារ ក្នុងខេត្តព្រះសីហនុ ទទួលបានការលើកទឹកចិត្តពិសេសពីរាជរដ្ឋាភិបាល។ នេះបើតាមការចុះផ្សាយរបស់ FMIS Cambodia នាថ្ងៃទី០៣ ខែធ្នូ ឆ្នាំ២០២៤។

គម្រោងវិនិយោគ និងធុរកិច្ចចំនួន៤៨នេះ មានជាអាទិ៍ គម្រោងបង្កើតតំបន់សេដ្ឋកិច្ចពិសេសនៅស្រុកព្រៃនប់, គម្រោងរោងចក្រផលិត និងកែច្នៃអាលុយមីញ៉ូម, គម្រោងរោងចក្រផលិតសម្ភារប្រើប្រាស់ក្នុងផ្ទះដើម្បីនាំចេញទៅទីផ្សារអឺរ៉ុប និងអាម៉េរិក, គម្រោងបង្កើតសហគមន៍អាជីវកម្មនៅក្រុងរាម និងគម្រោងអាទិភាពផ្សេងៗទៀត។ ក្រុមការងារជំរុញការវិនិយោគក្នុងខេត្តព្រះសីហនុ បានឱ្យដឹងថា គិតត្រឹមខែធ្នូ ឆ្នាំ ២០២៤នេះ មានគម្រោងចំនួន២១៣ ត្រូវបានទទួលការលើកទឹកចិត្តពិសេស ដែលរួមមាន គម្រោងពាក់ព័ន្ធនឹងអគារជាប់គាំងមាន១០១, គម្រោងថ្មីមានចំនួន ៨៩, ការពង្រីកគម្រោងមានចំនួន១៩ និង គម្រោងមានស្រាប់មានចំនួន៤។

គម្រោងខាងនេះ ក៏រាប់បញ្ចូលគម្រោងដែលមានសក្តានុពលសំខាន់ៗ ដូចជា គម្រោងបង្កើតតំបន់សេដ្ឋកិច្ចពិសេសនៅស្រុកព្រៃនប់, គម្រោងរោងចក្រផលិត និងកែច្នៃអាលុយមីញ៉ូម, គម្រោងផលិតផ្ទាំងសូឡា និងគ្រឿងបង្គុំ, គម្រោងមជ្ឈមណ្ឌលពាណិជ្ជកម្មផ្កាយ៥ និងគម្រោងសួនកសិ-ឧស្សាហកម្មជាដើម។ ជាមួយគ្នានេះ គម្រោងដែលមានទុនវិនិយោគលើសពី១០០ លានដុល្លារ មានចំនួន២៣ គម្រោង ។ គួរបញ្ជាក់ថា ជំរុញការវិនិយោគក្នុងខេត្តព្រះសីហនុ បានសម្របសម្រួលដោះស្រាយវិវាទពាក់ព័ន្ធអគារជាប់គាំង ដែលអូសបន្លាយអស់រយៈពេល ៤-៥ឆ្នាំកន្លងមក បានចំនួន ៦គម្រោង ដែលអនុញ្ញាតឱ្យម្ចាស់គម្រោងអាចប្រើប្រាស់អគារឡើងវិញសម្រាប់ប្រកបធុរកិច្ច៕