ភ្នំពេញ៖ ក្រុមហ៊ុនឡាន Toyota Tsusho Manufacturing មានគម្រោងបង្កើតមជ្ឈមណ្ឌលបណ្តុះបណ្តាលជំនាញយានយន្ត (Toyota Training Center) ក្នុងបរិវេណគ្រឹះស្ថាន TVET ដើម្បីអភិវឌ្ឍន៍ជំនាញក្នុងវិស័យយានយន្តនៅកម្ពុជា។

លោក Fujita Ryoji នាយកក្រុមហ៊ុន Toyota Tsusho Manufacturing (Cambodia) Co., Ltd. បានលើកឡើងក្នុងជំនួបជាមួយ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ថា គម្រោងបង្កើតមជ្ឈមណ្ឌលខាងលើនេះ មិនត្រឹមតែដើម្បីដំណើរការផលិតកម្មរថយន្តរបស់ក្រុមហ៊ុននោះទេ តែនឹងផ្តល់ការបណ្តុះបណ្តាញជំនាញវិស័យយានយន្តដល់សិស្សនិស្សិត និងគ្រូបង្គោល ជាមួយនឹងបច្ចេកវិទ្យាថ្មីៗ នៃវិស័យយានយន្តសម្រាប់កម្ពុជា។

លោក Fujita Ryoji ក៏បានបញ្ជាក់ថា គម្រោងមជ្ឈមណ្ឌលបណ្តុះបណ្តាលជំនាញយានយន្តនេះ អាចនឹងមានកិច្ចសហប្រតិបត្តិការជាមួយគ្រឹះស្ថាន TVET នៅកម្ពុជា ក្នុងការបណ្តុះបណ្តាលជំនាញដូចជា ជំនាញថែទាំជួសជុលរថយន្ត ជំនាញតោននិងបាញ់ថ្នាំរថយន្ត រួមនិងការផ្តល់នូវឧបករណ៍សម្ភារនានាពាក់ព័ន្ធនឹងវិស័យរថយន្ត ជាដើម។ ទាក់ទងនឹងការគម្រោងខាងលើនេះ ឯកឧត្តម ហេង សួរ មានប្រសាសន៍ថា ក្រសួងការងារ នឹងសហការជាមួយក្រុមហ៊ុន ក្នុងការអភិវឌ្ឍការបណ្តុះបណ្តាលធនធានមនុស្សក្នុងវិស័យយានយន្តនៅកម្ពុជា៕