ភ្នំពេញ៖ ក្រុមការងារកិច្ចសហប្រតិបត្តិការអាល្លឺម៉ង GIZ នឹងផ្តល់ការគាំទ្រដល់សភាពាណិជ្ជកម្មកម្ពុជាទៅលើការតស៊ូមតិដើម្បីគាំទ្រដល់វិស័យឯកជន, លើការនាំចេញផលិតផលរបស់សហគ្រាសធុនតូច និងមធ្យម (SMEs) នៅកម្ពុជា, មន្ទីរពិសោធន៍សម្រាប់ការនាំចេញ និងគាំទ្រដល់ព័ត៌មានទីផ្សារចំពោះវិស័យឯកជន។ នេះបើតាមការចុះផ្សាយរបស់សភាពាណិជ្ជកម្មកម្ពុជា នាថ្ងៃទី២៨ ខែវិច្ឆិកា ឆ្នាំ២០២៤។

ជំនួបពិភាក្សារវាង ឯកឧត្តម ឧកញ៉ា ងួន ម៉េងតិច អគ្គនាយកសភាពាណិជ្ជកម្មកម្ពុជា និងក្រុមការងារកិច្ចសហប្រតិបត្តិការអាល្លឺម៉ង GIZ ដែលដឹកនាំដោយ Mr. Till Anert ប្រធានគម្រោង GIZ EU GATE នៅកម្ពុជានេះ ធ្វើឡើងក្នុងគោលបំណងពិភាក្សាពីកិច្ចសហប្រតិបត្តិការបន្ថែមរវាងសភាពាណិជ្ជកម្មកម្ពុជា និង GIZ។ ជាមួយគ្នានេះ GIZ ក៏បានអញ្ជើញតំណាងរបស់សភាពាណិជ្ជកម្មកម្ពុជា ឱ្យទៅចូលរួមកិច្ចប្រជុំនាពេលខាងមុខ ដែលជាការរៀបចំឡើងដោយ GIZផងដែរ។

ក្នុងកិច្ចពិភាក្សានេះ ឯកឧត្តម ឧកញ៉ា ងួន ម៉េងតិច ក៏បានលើកឡើងអំពីសហការជាមួយនឹងក្រុមការងារកិច្ចសហប្រតិបត្តិការអាល្លឺម៉ង GIZ ក្នុងការជួយគាំទ្រដល់សភាពាណិជ្ជកម្មកម្ពុជា, វិស័យឯកជន និងបានអរគុណ ដល់ GIZ ដែលបានរួមគ្នាជាមួយនឹងសភាពាណិជ្ជកម្មកម្ពុជា ក្នុងពេលកន្លងមកទៀតដែរ៕