ភ្នំពេញ៖ កម្មវិធីហិរញ្ញប្បទានសម្រាប់សហគ្រិននាំចេញ ដែលផ្តល់នូវដំណោះស្រាយហិរញ្ញវត្ថុក្នុងការនាំចេញ នឹងជួយលើកស្ទួយសហគ្រាសធុនតូច និងមធ្យម(SMEs)ក្នុងស្រុក ក្នុងការប្រកួតប្រជែងលើឆាកអន្តរជាតិ។ បើតាមការចុះផ្សាយរបស់សាជីវកម្មធានាឥណទានកម្ពុជា (CGCC) នាថ្ងៃទី២៥ ខែវិច្ឆិកា ឆ្នាំ២០២៤ កម្មវិធីហិរញ្ញប្បទានសម្រាប់សហគ្រិននាំចេញនេះ ក៏បានដាក់បញ្ចូលគម្រោងធានាឥណទាន និងកម្មវិធីកសាងសមត្ថភាព និងជំនាញសម្រាប់ SMEs។

កម្មវិធីហិរញ្ញប្បទានសម្រាប់សហគ្រិននាំចេញនេះ ដាក់ដំណើរការដោយធនាគារ មេយប៊ែង សហការជាមួយគម្រោង Feed the Future Cambodia Harvest III (គម្រោងហាវែស III) ក្រោមជំនួយពីទីភ្នាក់ងារសហរដ្ឋអាម៉េរិកសម្រាប់ការអភិវឌ្ឍអន្តរជាតិ (USAID)។ កិច្ចសហប្រតិបត្តិការនេះ មានគោលបំណងលើកកម្ពស់ការប្រកួតប្រជែងរបស់ SMEs ក្នុងស្រុកលើឆាកអន្តរជាតិ ដើម្បីជំរុញឱ្យមានការអភិវឌ្ឍប្រកបដោយចីរភាព និងពង្រឹងវត្តមានរបស់ប្រទេសកម្ពុជាលើទីផ្សារអន្តរជាតិ។

កម្មវិធីហិរញ្ញប្បទានសម្រាប់សហគ្រិននាំចេញនេះ ក៏ផ្តល់នូវដំណោះស្រាយហិរញ្ញវត្ថុ ដែលមានដូចជា កម្ចីសម្រាប់ជាទុន ហិរញ្ញប្បទានសម្រាប់ការនាំចេញ ទីផ្សាររូបិយប័ណ្ណបរទេសចំនួន២១ប្រភេទដោយមានអត្រាប្រកួតប្រជែង ដំណោះស្រាយផ្ទេរ និងទទួលប្រាក់ និងសេវាហិរញ្ញប្បទានពាណិជ្ជកម្ម ដែលទាំងអស់នេះ គឺជាដំណោះស្រាយសម្រាប់ SMEs ក្នុងការជំនះឧបសគ្គផ្នែកហិរញ្ញវត្ថុ និងបន្តកំណើនលើទីផ្សារអន្តរជាតិ។

ក្នុងពិធីដាក់ឱ្យដំណើរការនេះ លោក រ័ត្ន សោភ័ណ នាយកប្រតិបត្តិ និងនាយកប្រចាំប្រទេស របស់ធនាគារ មេយប៊ែង ខេមបូឌា មានលើកឡើងថា កម្មវិធីហិរញ្ញប្បទាននេះ គឺជាដំណោះស្រាយយ៉ាងសំខាន់សម្រាប់សហគ្រាសក្នុងស្រុក ដែលមានគោលបំណងពង្រីកការនាំចេញរបស់ខ្លួនទៅកាន់ទីផ្សារអន្តរជាតិ ឬទៅកាន់ទីផ្សារអន្តរជាតិថ្មី។ តាមរយៈការគាំទ្រដល់ SMEs នេះ គឺដើម្បីជម្នះឧបសគ្គលើផ្នែកហិរញ្ញវត្ថុ ភាពជាដៃគូចម្រុះភាគីក្នុងការចូលរួមជំរុញកំណើនអាជីវកម្មបុគ្គល ក៏ដូចជារួមចំណែកដល់ការអភិវឌ្ឍសេដ្ឋកិច្ចកម្ពុជាឱ្យកាន់តែមានភាពទូលំទូលាយ។

ជាមួយគ្នានេះ លោក នីមីស ហ្សាវឺរី ប្រធានគម្រោងហាវែស III មានបញ្ជាក់ថា ជាមួយនឹងដំណោះស្រាយហិរញ្ញប្បទានពាណិជ្ជកម្មថ្មីនេះ SMEs អាចបាននូវដើមទុនចាំបាច់ដើម្បីគ្រប់គ្រងចំណាយផលិតកម្ម វិនិយោគលើការបង្កើនគុណភាព និងបំពេញតម្រូវការបញ្ជាទិញពីអន្តរជាតិ។ ដំណោះស្រាយហិរញ្ញប្បទានពាណិជ្ជកម្មដែលប្រកបដោយប្រសិទ្ធភាពនេះ គឺមានសារសំខាន់ដល់សហគ្រាសក្នុងស្រុក ក្នុងការជួយផ្សារភ្ជាប់គម្លាតលំហូរសាច់ប្រាក់ប៉ុណ្ណោះទេ ប៉ុន្តែថែមទាំងអនុញ្ញាតឱ្យ SMEs ប្រកួតប្រជែងកាន់តែមានប្រសិទ្ធភាពទៀតផង៕