ភ្នំពេញ៖ គណៈកម្មាធិការវិនិយោគនេប៉ាល់ បង្ហាញបំណងស្វែងយល់អំពីឧត្តមានុវត្តន៍ក្នុងការទាក់ទាញវិនិយោគផ្ទាល់ពីបរទេសរបស់កម្ពុជា ពិសេសតួនាទី និងភារកិច្ចរបស់គណៈកម្មាធិការវិនិយោគកម្ពុជា។ នេះជាការលើកឡើងរបស់លោក Pradyumna Prasad Upadhyay ប្រធាននាយកដ្ឋាននៃគណៈកម្មាធិការវិនិយោគនេប៉ាល់ នាថ្ងៃទី២២ ខែវិច្ឆិកា ឆ្នាំ២០២៤។

ក្នុងកិច្ចពិភាក្សាជាមួយគណៈកម្មាធិការវិនិយោគនេប៉ាល់ ឯកឧត្ដម សួន សុផល អគ្គលេខាធិការរងគណៈកម្មាធិការវិនិយោគកម្ពុជា បានលើកឡើងអំពីតួនាទីរបស់គណៈកម្មាធិការវិនិយោគកម្ពុជាក្នុងការជំរុញទាក់ទាញ ផ្ដល់កិច្ចសម្រួល និងការធានានូវសេវាថែទាំជូនវិនិយោគិនប្រកបដោយប្រសិទ្ធភាព និងប្រសិទ្ធផល ព្រមទាំងផ្ដល់នូវការលើកទឹកចិត្តស្របតាមច្បាប់ស្ដីពីវិនិយោគកម្ពុជាផងដែរ។

តាមការចុះផ្សាយរបស់ក្រុមប្រឹក្សាអភិវឌ្ឍន៍កម្ពុជា ឯកឧត្ដម សួន សុផល ក៏បានបញ្ជាក់ពីអត្ថិភាពនៃកិច្ចសន្ទនារវាងរដ្ឋនិងវិស័យឯកជនកម្ពុជា-ជប៉ុន, កូរ៉េ, សហរដ្ឋអាម៉េរិក និងអឺរ៉ុប ពិសេសវេទិការាជរដ្ឋាភិបាល-វិស័យឯកជន ដែលជាថ្នាលក្នុងការថែទាំវិនិយោគនៅកម្ពុជាឱ្យតែមានទំនុកចិត្តខ្ពស់ក្នុងការបន្ដសកម្មភាពវិនិយោគរបស់ខ្លួន។ បន្ថែមពីនេះ អគ្គលេខាធិការរងគណៈកម្មាធិការវិនិយោគកម្ពុជា ក៏បានបន្តបញ្ជាក់ពីអត្ថិភាពនៃតុវិនិយោគតាមប្រទេស មានជាអាទិ៍តុចិន តុជប៉ុន តុកូរ៉េ និងតុអឺរ៉ុប ដែលបាននិងកំពុងចូលរួមផ្តល់សេវាវិនិយោគប្រកបដោយជាទីទុកចិត្តសម្រាប់វិនិយោគិន និងធុរជន៕