ភ្នំពេញ៖ លោកជំទាវ រត្ន ម៉ានី ឯកអគ្គរាជទូតវិសាមញ្ញ និងពេញសមត្ថភាពរបស់កម្ពុជាប្រចាំឥណ្ឌា នឹងមានការសហការជាមួយសមាគមទេសចរណ៍កម្ពុជា (CATA) រៀបចំកញ្ចប់ទស្សនា និងការជំរុញជើងហោះហើរត្រង់ពីឥណ្ឌាមកកាន់កម្ពុជាឱ្យបានច្រើន ដើម្បីទាក់ទាញអ្នកវិនិយោគ ក្រុមហ៊ុនសាជីវកម្មធំៗ និងអ្នកទេសចរឥណ្ឌាមកកម្ពុជាបន្ថែមទៀត។

ក្នុងកិច្ចពិភាក្សា នៅទីស្តីការក្រសួងទេសចរណ៍ កាលពីទី២០ ខែវិច្ឆិកា ឆ្នាំ២០២៤ លោកជំទាវ រត្ន ម៉ានី ក៏បានបញ្ជាក់ពីការរៀបចំយន្តការ និងយុទ្ធសាស្ត្ររៀបចំកញ្ចប់ទស្សនា និងជំរុញជើងហោះហើរត្រង់ខាងលើនេះ ប្រាប់ទៅ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍។ លើសពីនេះ លោកជំទាវ រត្ន ម៉ានី បានស្នើសុំអនុសាសន៍ណែនាំ និងកិច្ចសហការជាមួយក្រសួងទេសចរណ៍ ផ្សព្វផ្សាយសភាពការណ៍ពិត សុខសន្តិភាព និងស្ថិរភាព សណ្តាប់ធ្នាប់សាធារណៈល្អ និងវិស័យទេសចរណ៍របស់កម្ពុជាទៅកាន់សាធារណជនឥណ្ឌាផងដែរ៕