ភ្នំពេញ៖ ក្រុមហ៊ុន Guangdong Juxiang General Aviation Co., Ltd របស់ចិន ដែលមានប្រតិបត្តិការលើការផលិតជី ថ្នាំសម្លាប់សត្វល្អិត កសិកម្មទំនើប កសិកម្មឆ្លាតវៃ និងដ្រូនកសិកម្ម កំពុងពិនិត្យលទ្ធភាពបណ្តាក់ទុនវិនិយោគវិស័យកសិកម្ម និងកសិ-ឧស្សាហកម្មនៅកម្ពុជា ដោយក្នុងនោះក្រុមហ៊ុន នឹងនាំយកនូវបច្ចេកវិទ្យាថ្មីៗសម្រាប់បម្រើប្រយោជន៍ដល់វិស័យទាំងនេះ។

ក្នុងជំនួបជាមួយ ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា លោក Peter Chen ប្រធានក្រុមប្រឹក្សាភិបាល ក្រុមហ៊ុន Guangdong Juxiang General Aviation Co., Ltd ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា ឱ្យក្រុមហ៊ុនស្វែងយល់ឱ្យច្បាស់ពីទីផ្សារ និងកាលានុវត្តភាពវិនិយោគលើកសិកម្មទំនើប ដែលរំពឹងថានឹងចូលរួមពង្រឹង និងពង្រីកកិច្ចសហការលើការអភិវឌ្ឍរបៀងមច្ឆា និងអង្ករកម្ពុជា-ចិនឱ្យកាន់តែរីកចម្រើន។

ឯកឧត្តម ជា វុទ្ធី បានលើកឡើងពីគោលនយោបាយគាំទ្រ និងការលើកទឹកចិត្តផ្នែកសារពើពន្ធនានារបស់រាជរដ្ឋាភិបាលកម្ពុជា លើវិស័យកសិកម្ម ដើម្បីឱ្យកាន់តែមានភាពប្រកួតប្រជែង បរិយាបន្ន ទំនើបកម្ម និងធន់នឹងការប្រែប្រួលអាកាសធាតុ។ ឯកឧត្តម ជា វុទ្ធី ជំរុញឱ្យក្រុមហ៊ុនសហការជាមួយក្រសួង ស្ថាប័នពាក់ព័ន្ធ ដើម្បីស្វែងយល់ពីកិច្ចការវិនិយោគ តាមរយៈយន្តការតុវិនិយោគកសិ-ចំណីអាហារ។ នេះបើតាមការចុះផ្សាយរបស់ក្រុមប្រឹក្សាអភិវឌ្ឍន៍ កាលថ្ងៃទី៦ ខែវិច្ឆិកា ឆ្នាំ២០២៤៕