ភ្នំពេញ៖ ក្រុមហ៊ុន Shandong (Cambodia) Economic and Technological Development Zone មានគម្រោងពង្រីកការវិនិយោគលើវិស័យកសិកម្មដោយផ្ដោតលើដំណាំដំឡូងមី និងស្វាយចន្ទី ព្រមទាំងដំឡើងរោងចក្រកែច្នៃគ្រាប់ស្វាយចន្ទីនៅកម្ពុជា។ នេះបើតាមការចុះផ្សាយរបស់ សម្តេចធិបតី ហ៊ុន ម៉ាណែត នាថ្ងៃទី៧ ខែវិច្ឆិកា ឆ្នាំ២០២៤។

ក្នុងជំនួបជាមួយ លោក Wu Yu Jie ប្រធានក្រុមហ៊ុន Shandong (Cambodia) Economic and Technological Development Zone សម្តេចធិបតី ហ៊ុន ម៉ាណែត បានពេញចិត្តចំពោះការបោះទុនវិនិយោគ និងបង្កើតរោងចក្រកែច្នៃគ្រាប់ស្វាយចន្ទីនៅកម្ពុជារបស់ក្រុមហ៊ុនខាងលើ ព្រមទាំងចង់ឃើញក្រុមហ៊ុនវិនិយោគទាំងលើការដាំដុះ និងការកែច្នៃ ដើម្បីនាំចេញកសិផលដោយផ្ទាល់ពីកម្ពុជា ទៅកាន់ទីផ្សារចិន និងពិភពលោក។

នាឱកាសចូលរួមកិច្ចប្រជុំកំពូលមហាអនុតំបន់មេគង្គ (GMS) លើកទី៨ នាថ្ងៃទី៦-៧ ខែវិច្ឆិកា ឆ្នាំ២០២៤ នៅទីក្រុងគុនមិញ ខេត្តយូណាន ប្រទេសចិន សម្តេចធិបតី ហ៊ុន ម៉ាណែត បានលើកឡើងពីការផ្ដល់អាទិភាព និងការលើកទឹកចិត្តចំពោះការវិនិយោគក្នុងវិស័យកសិកម្ម និងកសិ-ឧស្សាហកម្ម។ បន្ថែមពីនេះ ប្រមុខរាជរដ្ឋាភិបាល ជំរុញឱ្យក្រុមហ៊ុនខាងលើ បន្តសហការជាមួយក្រសួងពាក់ព័ន្ធ ដូចជាក្រសួងកសិកម្ម រុក្ខាប្រមាញ់ និងនេសាទ និងក្រុមប្រឹក្សាអភិវឌ្ឍន៍កម្ពុជា ដើម្បីទទួលបានការលើកទឹកចិត្តបន្ថែម។ គួរបញ្ជាក់ថា ក្រុមហ៊ុន Shandong (Cambodia) បានវិនិយោគនៅកម្ពុជា ចាប់តាំងពីឆ្នាំ២០១២ ក្នុងវិស័យកសិកម្ម ដោយផ្តោតលើដំណាំដំឡូងមី និងស្វាយចន្ទី៕