ភ្នំពេញ៖ កម្ពុជា និងអ៊ុយក្រែន ពិនិត្យលទ្ធភាពក្នុងការចរចា និងការឈានទៅដល់ការចុះកិច្ចព្រមព្រៀងទ្វេភាគី ស្តីពីការជំរុញ និងការការពារអ្នកវិនិយោគទៅវិញទៅមក ដើម្បីជាស្ពានតភ្ជាប់ប្រទេសកម្ពុជានិងអ៊ុយក្រែន ពិសេសនឹងនាំយកវិនិយោគិនអ៊ុយក្រែនមកកម្ពុជា។ នេះបើតាមការចុះផ្សាយរបស់ក្រុមប្រឹក្សាអភិវឌ្ឍន៍កម្ពុជា នាថ្ងៃទី៣០ ខែតុលា ឆ្នាំ២០២៤។

ក្នុងជំនួបពិភាក្សាជាមួយឯកឧត្តម Taras Kachka អនុរដ្ឋមន្ត្រីក្រសួងសេដ្ឋកិច្ចប្រទេសអ៊ុយក្រែន ឯកឧត្តម បណ្ឌិត សរ សិនិរ៉ា អគ្គលេខាធិការរងគណៈកម្មាធិការវិនិយោគកម្ពុជា បានលើកឡើងពីគោលបំណងក្នុងការពង្រឹងកិច្ចសហប្រតិបត្តិការសេដ្ឋកិច្ចនិងវិនិយោគទ្វេភាគី ព្រមទាំងស្នើឱ្យភាគីអ៊ុយក្រែនស្វែងយល់ពីវិស័យសក្តានុពលសម្រាប់ការវិនិយោគនៅប្រទេសកម្ពុជាផងដែរ។

ឯកឧត្តម Taras Kachka បានលើកឡើងថា ប្រទេសអ៊ុយក្រែន ជាប្រទេសដែលមានការអភិវឌ្ឍយ៉ាងខ្លាំងក្លាក្នុងវិស័យបច្ចេកវិទ្យាកសិកម្ម ជាពិសេស ជី និងចំណីសត្វ ព្រមទាំងជាប្រទេសដែលត្រូវបានគេទទួលស្គាល់ទៅលើការផ្តួចផ្តើមវិស័យបច្ចេកវិទ្យាព័ត៌មាន (IT Initiatives)។ ជាមួយគ្នានេះ ឯកឧត្តមបណ្ឌិត សរ សិនិរ៉ា ក៏បានបញ្ជាក់ពីភាពបើកចំហរនៃទីផ្សារវិនិយោគនៅកម្ពុជា ដោយវិនិយោគិនបរទេសរួមទាំងអ៊ុយក្រែន អាចវិនិយោគលើគ្រប់វិស័យ ដោយទទួលបានការធានា ការការពារ និងការលើកទឹកចិត្តយ៉ាងសន្ធឹកសន្ធាប់ដូចមានកំណត់ក្នុងច្បាប់ស្តីពីវិនិយោគនិងបទដ្ឋានគតិយុត្តជាធរមានរបស់កម្ពុជា៕