ភ្នំពេញ៖ កម្ពុជា និងរដ្ឋកាតា បានឯកភាពគ្នាពន្លឿនបញ្ចប់កិច្ចប្រជុំចរចាលើកិច្ចព្រមព្រៀង ស្ដីពី ការចៀសវាងការយកពន្ធត្រួតគ្នា (DTA) ឱ្យបានឆាប់តាមតែអាចធ្វើទៅបាន។ ការឯកភាពនេះធ្វើឡើងរវាងលោកបណ្ឌិត សេង ជាសិទ្ធ ប្រធាននាយកដ្ឋាននីតិកម្ម គោលនយោបាយ សារពើពន្ធ និងសហប្រតិបត្តិការពន្ធដារអន្តរជាតិ និងលោក Abdulla Ahmed Al-Sulaiti ប្រធានផ្នែកសន្ធិសញ្ញាពន្ធនិងការចរចា នៃនាយកដ្ឋានសន្ធិសញ្ញាពន្ធ និងកិច្ចសហប្រតិបត្តិការអន្តរជាតិរបស់រដ្ឋកាតា។

ក្នុងកិច្ចប្រជុំចរចាលើកិច្ចព្រមព្រៀង DTA ជុំទី១ ជាមួយរដ្ឋកាតា នេះ លោក Abdulla Ahmed Al-Sulaiti បានបញ្ជាក់ថា កិច្ចព្រមព្រៀង DTA គឺមានសារសំខាន់ណាស់ ក្នុងការពង្រីកកិច្ចសហប្រតិបត្តិការពន្ធដារទ្វេភាគីរវាងកម្ពុជា និងកាតា។ ជាមួយគ្នានេះ លោក Abdulla Ahmed Al-Sulaiti បានបន្តថា៖ «លោកមានបំណងចង់ឱ្យការចរចានេះ អាចបញ្ចប់ទៅឱ្យបានឆាប់ តាមតែអាចធ្វើបានផងដែរ»។

កិច្ចប្រជុំដែលធ្វើឡើងកាលពីថ្ងៃទី២១-២៤ ខែតុលា ឆ្នាំ២០២៤នេះ លោកបណ្ឌិត សេង ជាសិទ្ធ បានលើកឡើងថា កម្ពុជា ក៏បានឯកភាពជាមួយភាគីកាតា ដើម្បីព្យាយាមបញ្ចប់ការចរចាកិច្ចព្រមព្រៀង DTA នេះ ឱ្យបានឆាប់ផងដែរ។ លោកបណ្ឌិត សេង ជាសិទ្ធ ក៏បានបញ្ជាក់អំពីសារៈសំខាន់នៃកិច្ចព្រមព្រៀង DTA ក្នុងការជំរុញកំណើនពាណិជ្ជកម្ម និងការវិនិយោគទៅវិញទៅមក ជាពិសេសអត្ថប្រយោជន៍ដែលសហគ្រាសក្នុងវិស័យដឹកជញ្ជូនតាមផ្លូវអាកាស និងផ្លូវទឹក រវាងកម្ពុជា និងកាតា អាចទទួលបានពីកិច្ចព្រមព្រៀងនេះផងដែរ៕