ភ្នំពេញ៖ ក្រុមសិស្សវិទ្យាល័យកម្ពុជាដែលមានសមាជិត៩នាក់ បានទទួលជ័យលាភីលេខ២ក្នុងការប្រកួតរ៉ូបូតអន្តរជាតិ FIRST Global Challenge នៅទីក្រុងអាតែន ប្រទេសក្រិក ពីថ្ងៃទី២៦ ដល់ថ្ងៃទី២៩ ខែកញ្ញា ឆ្នាំ២០២៤។ ពួកគេបានបង្ហាញពីជំនាញដ៏ល្អក្នុងការបង្កើតរ៉ូបូត នៅក្នុងការប្រកួតប្រជែងជាមួយក្រុមសិស្សមកពីជាង១៩០ប្រទេស។

នៅក្នុងពិធីជួបសំណេះសំណាល នៅទីស្តីការក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍កាលពីថ្ងៃទី២១ ខែតុលា ឆ្នាំ២០២៤ ក្រុមយុវជនជ័យលាភីទាំងនេះបានបង្ហាញការប្តេជ្ញាចិត្តក្នុងការជំរុញបច្ចេកវិទ្យារ៉ូបូតនៅកម្ពុជា។ ឯកឧត្តម ដាវ អានសាន រដ្ឋលេខាធិការ ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ បានលើកឡើងពីសារសំខាន់នៃវិទ្យាសាស្ត្រ និងបច្ចេកវិទ្យាសម្រាប់អនាគតរបស់កម្ពុជា។ ឯកឧត្តមបានកោតសរសើរដល់ជ័យលាភីទាំងអស់ចំពោះសមិទ្ធផលជោគជ័យរបស់ពួកគេ ព្រមទាំងការបង្ហាញជំនាញសំខាន់ៗ ដូចជាជំនាញទំនាក់ទំនង ការធ្វើការជាក្រុម និងការដោះស្រាយបញ្ហាជាដើម។ ឯកឧត្តម ក៏បានលើកទឹកចិត្តជ័យលាភីទាំងអស់ឱ្យបន្តស្មារតីនៃការប្រកួតប្រជែង និងខិតខំប្រឹងប្រែង ដើម្បីឧត្តមភាពថ្មីៗបន្ថែមទៀត ដោយលើកឡើងពីតួនាទីរបស់ពួកគេក្នុងការសម្រេចចក្ខុវិស័យកម្ពុជាឆ្នាំ២០៥០។

ក្រុមសិស្សដែលចូលរួមការប្រកួតរ៉ូបូតអន្តរជាតិ FIRST Global Challenge ឆ្នាំ២០២៤ ក្រោមប្រធានបទ "Refuel the Future" ត្រូវដោះស្រាយបញ្ហាថាមពលសាកលតាមរយៈបច្ចេកវិទ្យារ៉ូបូត ដោយលើកកម្ពស់ការអនុវត្តប្រកបដោយនិរន្តរភាព។ ក្រុមសិស្សកម្ពុជាបានចំណាយពេលជាច្រើនខែដើម្បីបង្កើតរ៉ូបូត ដែលបង្ហាញពីភាពច្នៃប្រឌិត និងការសហការគ្នា។ ពួកគេបានចែករំលែកចំណេះដឹងស្តីពីប្រសិទ្ធភាពថាមពល និងនវានុវត្តន៍ ដែលនឹងជំរុញទឹកចិត្តអនាគតវិស្វករ និងអ្នកវិទ្យាសាស្ត្រជំនាន់ក្រោយរបស់កម្ពុជា៕