ភ្នំពេញ៖ ក្រសួងប្រៃសណីយ៍ និងទូរគមនាគមន៍ បានរៀបចំសិក្ខាសាលាពិគ្រោះយោបល់ ដើម្បីប្រមូលធាតុចូលសម្រាប់មគ្គទេសក៍បន្ថែមរបស់អាស៊ាន ដែលស្ដីពីអភិបាលកិច្ច និងសីលធម៌បញ្ញាសិប្បនិម្មិត (AI) សម្រាប់បញ្ញាសិប្បនិម្មិតក្នុងការបង្កើតមាតិកា។ សិក្ខាសាលាពិគ្រោះយោបល់នេះ មានគោលបំណងតម្រែតម្រង់ការរចនា ការអភិវឌ្ឍ និងការដាក់ឱ្យប្រើបញ្ញាសិប្បនិម្មិតក្នុងការបង្កើតមាតិកានៅអាស៊ានឱ្យមានសីលធម៌និងការទទួលខុសត្រូវ។

សិក្ខាសាលាដែលរៀបចំឡើងនាថ្ងៃទី១៧ ខែតុលា ឆ្នាំ២០២៤ ដោយមានអ្នកចូលរួមចំនួន ១២០នាក់នេះ ធ្វើឡើងក៏ដើម្បីសម្រាប់ប្រាស្រ័យទាក់ទងជាផ្លូវការលើកដំបូង រវាងតួអង្គអភិបាលកិច្ចបញ្ញាសិប្បនិម្មិត វិស័យសាធារណៈ វិស័យឯកជន វិស័យអប់រំ និងសង្គមស៊ីវិលផងដែរ។ សិក្ខាសាលាខាងលើនេះ រៀបចំឡើងស្របតាមស្មារតីរបស់ក្រុមការងារអភិបាលកិច្ចបញ្ញាសិប្បនិម្មិត របស់ឧត្តមមន្ត្រីឌីជីថលអាស៊ាន (ADGSOM) ចំណុះឱ្យរដ្ឋមន្ត្រីឌីជីថលអាស៊ាន (ADGMIN) ដើម្បីសហការលើកិច្ចសហការអភិបាលកិច្ចបញ្ញាសិប្បនិម្មិតក្នុងតំបន់។

គួរបញ្ជាក់ថា បច្ចេកវិទ្យាបញ្ញាសិប្បនិម្មិត (AI) ជាបច្ចេកវិទ្យាព័ត៌មានដែលមានការប្រើប្រាស់ជាយូរមកហើយក្នុងវិស័យបច្ចេកវិទ្យាគមនាគមន៍និងព័ត៌មាន ខណៈដែលក្នុងរយៈពេល ២ឆ្នាំនេះ ពិភពលោកបានចាប់អារម្មណ៍លើការប្រើប្រាស់ AI កាន់តែខ្លាំង ដោយសារការរីកដុះដាលនៃបញ្ញាសិប្បនិម្មិតសម្រាប់បង្កើតមាតិកា៕