ភ្នំពេញ៖ សម្តេចធិបតី ហ៊ុន ម៉ាណែត បានលើកឡើងក្នុងពិធី «អបអរសាទរខួបលើកទី ២០ឆ្នាំ នៃការចូលជាសមាជិករបស់កម្ពុជា នៅក្នុងអង្គការពាណិជ្ជកម្មពិភពលោក» នាថ្ងៃទី១៤ ខែតុលា ឆ្នាំ២០២៤ ថា កម្ពុជា បានត្រៀមខ្លួនរួចរាល់ ក្នុងការចាកចេញពីប្រទេសអភិវឌ្ឍន៍តិចតួច ដើម្បីពង្រឹងឯករាជ្យភាព និងភាពម្ចាស់ការលើខ្លួនឯង។

ជាមួយគ្នានេះ កម្ពុជា ត្រូវបានគណៈកម្មាធិការអភិវឌ្ឍន៍គោលនយោបាយនៃអង្គការសហប្រជាជាតិ ផ្ដល់អនុសាសន៍ឱ្យចាកចេញពីចំណាត់ថ្នាក់ប្រទេសដែលមានការអភិវឌ្ឍតិចតួចនៅឆ្នាំ២០២៩ ក្រោយគណៈកម្មាធិការ បានវាយតម្លៃឱ្យកម្ពុជាឆ្លងផុតនូវការត្រួតពិនិត្យរយៈពេល ៣ឆ្នាំម្ដងជាលើកទី២ នៃការចាក់ចេញពីក្រុមប្រទេសអភិវឌ្ឍន៍តិចតួច។

សម្តេចធិបតី ហ៊ុន ម៉ាណែត បានបញ្ជាក់ថា ការចាកចេញពីប្រទេសដែលមានការអភិវឌ្ឍតិចតួច នឹងនាំមកនូវផលវិបាកមួយចំនួនដល់កម្ពុជា ដូចជា ការបាត់បង់ប្រព័ន្ធអនុគ្រោះពាណិជ្ជកម្ម, ប្រព្រឹត្តកម្មពិសេស និងមានការចែងក្នុងកិច្ចព្រមព្រៀង WTO ក៏ដូចជាផលវិបាកមួយចំនួនទៀត ប៉ុន្តែយើងមិនអាចនៅជាប្រទេសអ្នកក្ររហូត ដើម្បីបានការអនុគ្រោះនោះទេ។

សម្តេចធិបតីនាយករដ្ឋមន្ត្រី បានបន្តថា រយៈពេល ២០ឆ្នាំ នៃការចូលជាសមាជិករបស់អង្គការពាណិជ្ជកម្មពិភពលោកនេះ កម្ពុជា មិនត្រឹមតែអាចបំពេញតម្រូវការក្នុងស្រុកប៉ុណ្ណោះទេ ថែមទាំងអាចនាំផលិតផលចេញទៅក្រៅប្រទេស និងការធ្វើពិពិធកម្មនាំចេញ ក្នុងទឹកប្រាក់ពី ៤ពាន់លាន ឡើងទៅដល់៤៨ពាន់លានដុល្លារទៀតផង៕