ភ្នំពេញ៖ បរិមាណកុងតឺន័រ ដែលបានឆ្លងកាត់កំពង់ផែស្វយ័តភ្នំពេញ ក្នុងរយៈពេល៩ខែ ឆ្នាំ២០២៤ មានចំនួន ១៦១,៣៧៣ ទូ (TEUs) កើនឡើង ២៦,១៣% បើធៀបនឹងរយៈពេលដូចគ្នាក្នុងឆ្នាំ២០២៣។ នេះតាមការចុះផ្សាយរបស់កំពង់ផែស្វយ័តភ្នំពេញ នាថ្ងៃទី០៩ ខែតុលា ឆ្នាំ២០២៤។

កំពង់ផែស្វយ័តភ្នំពេញ បានឱ្យដឹងថា បរិមាណកុងតឺន័រ ដែលបានឆ្លងកាត់ក្នុងខែកញ្ញា ឆ្នាំ២០២៤ គឺមានចំនួន ៥២ ២៨៣ ទូ (TEUs) ដែលតួលេខនេះ មានការកើនឡើង ៤៥,១១% បើធៀបនឹងខែកញ្ញា ឆ្នាំ២០២៣។ គួរបញ្ជាក់ថា បរិមាណកុងតឺន័រ ដែលបានឆ្លងកាត់កំពង់ផែស្វយ័តភ្នំពេញ ក្នុងរយៈពេល ៨ខែ ឆ្នាំ២០២៤ មានចំនួន៣១៣ ៧០៤ ទូ(TEUs) កើនឡើងជិត១៧% ខណៈដែលបរិមាណកុងតឺន័រឆ្លងកាត់ក្នុងខែសីហា មានចំនួន ៥៣ ៨២៥ ទូ (TUEs) កើនឡើងបាន ២៥,៤៦%។

ចំពោះ ចំណូលរបស់កំពង់ផែស្វយ័តភ្នំពេញ ក្នុងរយៈពេល ៨ខែ ឆ្នាំ២០២៤វិញ រកចំណូលបានជាង ២៧,១៧លានដុល្លារ ដែលកើនឡើងចំនួន ១៥% បើធៀបនឹងរយៈពេលដូចគ្នាក្នុងឆ្នាំ២០២៣ មានចំនួនជាង ២៣,៥៥លានដុល្លារ៕