ភ្នំពេញ៖ ក្រសួងវប្បធម៌ និងវិចិត្រសិល្បៈ នឹងរៀបចំមហាព្រឹត្តិការណ៍ «ស្នាមញញឹមនៃកម្ពុជា» លើកទី២ រយៈពេល២ថ្ងៃ គឺចាប់ពីថ្ងៃទី២៩ ដល់ថ្ងៃទី៣០ ខែតុលា ឆ្នាំ២០២៤ នៅលើទឹកដីអង្គរ នៃខេត្តសៀមរាប។ ព្រឹត្តិការណ៍នេះ នឹងរំលេចនូវវប្បធម៌ដ៏យូរលង់ អរិយធម៌ដ៏ចំណាស់ប្រចាំទ្វីបអាស៊ី និងក្បួនទ័ព ក្បួនដង្ហែពីក្រុមនាថការី និងក្រុមសិល្បៈល្បីៗជាង ៥០០នាក់។

នៅថ្ងៃ២៩ ខែតុលា កម្មវិធីនឹងប្រព្រឹត្តឡើងពីម៉ោង ៧:៣០នាទីព្រឹក ដល់ម៉ោង ៤:០០នាទីល្ងាច ដោយ មានពិធីបើកព្រឹត្តិការណ៍ ក្រោមអធិបតីភាពឯកឧត្តមឧបនាយករដ្ឋមន្រ្តី, ការតាំងពិព័រណ៍ម្អូបអាហារ និងវត្ថុអនុស្សាវរីយ៍ស្នាដៃសិល្បៈខ្មែរ, កម្មវិធីកម្សាន្តជាមួយចម្រៀង របាំប្រពៃណី និងពិធីដង្ហែក្បួនព្រះមហាក្សត្រខ្មែរ នាសម័យអាណាចក្រអង្គរ នៅបរិវេណខាងមុខ ប្រាសាទអង្គរតូច។

រីឯថ្ងៃទី៣០ តុលា វេលាម៉ោង ៨:៣០នាទីព្រឹក ដល់ម៉ោង ៦:០០នាទីល្ងាច នឹងមានការតាំងពិព័រណ៍ម្ហូបអាហារខ្មែរ ការកម្សាន្តជាមួយនឹងសិល្បៈ ចម្រៀងចម្រុះ ល្បែងប្រជាប្រិយ របាំប្រពៃណី និងការប្រកួតទីងមោង។ ចំពោះភ្ញៀវជាតិ និងអន្តរជាតិ ដែលស្លៀកសម្លៀកបំពាក់ប្រពៃណីមកចូលរួមក្នុងមហាព្រឹត្តិការណ៍ «ស្នាមញញឹមនៃកម្ពុជា» បានភ្លក្សអាហារ និងភេសជ្ជៈ ដោយសេរី និងឥតគិតថ្លៃ៕