ភ្នំពេញ៖ ឯកឧត្តម សោម ពិសិដ្ឋ អភិបាលខេត្តកែប បានទទួលយកមតិរិះគន់ក្នុងន័យស្ថាបនាផ្សេងៗ ពីប្រជាពលរដ្ឋ និងភ្ញៀវទេសចរទាំងអស់ពាក់ព័ន្ធទៅនឹងតម្លៃម្ហូបអាហារ នៅកែប។ ឯកឧត្តម សោម ពិសិដ្ឋ បញ្ជាក់ថា នឹងយកមតិរិះគន់ទាំងនេះ ជាមូលដ្ឋានក្នុងការកែលម្អ និងដោះស្រាយរាល់ចំណុចខ្វះខាតដែលជាក្តីកង្វល់របស់ប្រជាពលរដ្ឋ និងភ្ញៀវទេសចរ។

តាមការចុះផ្សាយជាសំណេររបស់ឯកឧត្តម សោម ពិសិដ្ឋ តម្លៃសេវាកម្ម និងម្ហូបអាហារ គឺជាចំណុចដែលរដ្ឋបាលខេត្តបានយកចិត្តទុកដាក់ជាប្រចាំ ដើម្បីឱ្យខេត្តកែបកាន់តែមានភាពទាក់ទាញ និងបង្កើនការអភិវឌ្ឍបន្ថែមនូវតំបន់សក្ដានុពលទេសចរណ៍នានា។ អភិបាលខេត្តកែប សោម ពិសិដ្ឋ ក៏បានជំរុញឱ្យពលរដ្ឋទាក់ទងមកកាន់លេខ ០១២ ៨២១ ៤១១ / ០៨៨ ៤៣២ ០០៣៤ / ០៩៩ ៥៤៩ ៧៨៩ បើសិនជួបប្រទះភាពមិនប្រក្រតីក្នុងការផ្តល់សេវាកម្មនានា និងតម្លៃម្ហូបអាហារ នៅកែប។

សូមជម្រាបផងដែរថា រយៈពេល ៣ថ្ងៃ នៃពិធីបុណ្យភ្ជុំបិណ្ឌ ប្រពៃណីជាតិខ្មែរ ខេត្តកែប ទទួលបានភ្ញៀវទេសចរជាតិ និងអន្តរជាតិមកទស្សនា និងសម្រាកលំហែកម្សាន្តយ៉ាងច្រើនកុះករចំនួន ៧៩,៥៣៨នាក់ កើនឡើង ២៦,១១% (១៦,៤៧២ នាក់) ធៀបនឹងឆ្នាំ២០២៣៕