ភ្នំពេញ៖ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា (CDC) បានជំរុញវិស័យឯកជនចំនួន ៥ស្ថាប័ន ក្រោមការសម្របសម្រួលពីសភាពាណិជ្ជកម្មសហរដ្ឋអាម៉េរិក ឱ្យពិនិត្យលទ្ធភាពបណ្ដាក់ទុនវិនិយោគនៅកម្ពុជានាពេលខាងមុខ។ នេះបើតាមការចុះផ្សាយរបស់ CDC នាថ្ងៃទី០៣ ខែតុលា ឆ្នាំ២០២៤។

ក្នុងកិច្ចពិភាក្សាការងារជាមួយវិស័យឯកជនចំនួន ៥ស្ថាប័ននេះ ឯកឧត្តម ស៊ុន ចាន់ថុល ក៏បានអំពាវនាវដល់ក្រុមហ៊ុនរបស់អាម៉េរិក ដែលកំពុងមានប្រតិបត្តិការអាជីវកម្មនៅកម្ពុជា ឱ្យពិនិត្យលទ្ធភាពបន្ថែមទៀតក្នុងការពង្រីកអាជីវកម្មនៅកម្ពុជា ដោយមានការសម្របសម្រួលពីក្រុមប្រឹក្សាអភិវឌ្ឍន៍កម្ពុជាផ្ទាល់។

ក្នុងជំនួបដដែលនេះ ឯកឧត្តមឧបនាយករដ្ឋមន្ត្រី អនុប្រធានទី១ ក៏បានផ្សព្វផ្សាយឱ្យបានកាន់តែទូលំទូលាយបន្ថែមទៀតអំពីបរិយាកាសវិនិយោគនៅកម្ពុជា កញ្ចប់លើកទឹកចិត្តនានា និងកិច្ចសម្របសម្រួលវិនិយោគពីក្រុមប្រឹក្សាអភិវឌ្ឍន៍កម្ពុជាផងដែរ៕