ភ្នំពេញ៖ អគ្គនាយកដ្ឋានអត្តសញ្ញាណកម្ម នៃក្រសួងមហាផ្ទៃ បានប្រាប់ពីលក្ខខណ្ឌ និងទីតាំងសម្រាប់ស្នើសុំអត្តសញ្ញាណប័ណ្ណសញ្ជាតិខ្មែរ ចំពោះពលរដ្ឋមានអាយុ ១៥ឆ្នាំឡើង និងពលរដ្ឋមានអត្តសញ្ញាណប័ណ្ណសញ្ជាតិខ្មែរដែលផុតសុពលភាព ឬមានសុពលភាពតិចជាង ១៨០ថ្ងៃ។ ចំពោះលក្ខខណ្ឌ និងទីតាំង ដែលពលរដ្ឋអាចស្នើសុំអត្តសញ្ញាណប័ណ្ណនោះ មានដូចខាងក្រោម៖

១. ប៉ុស្តិ៍នគរបាលរដ្ឋបាលឃុំ សង្កាត់, ២. អធិការដ្ឋាននគរបាលក្រុង ស្រុក ខណ្ឌ, ៣. ស្នងការដ្ឋាននគរបាលរាជធានី ខេត្ត, ៤. នាយកដ្ឋានអត្តសញ្ញាណប័ណ្ណសញ្ជាតិខ្មែរ ខណ្ឌច្បារអំពៅ និង៥. ស្នាក់ការផ្តល់អត្តសញ្ញាណប័ណ្ណសញ្ជាតិខ្មែរផ្សារទំនើបអ៊ីអនម៉ល២ ខណ្ឌសែនសុខ។ ចំពោះ ពលរដ្ឋមានអាយុ ១៥ឆ្នាំឡើង ត្រូវមានឯកសារភ្ជាប់ចំនួន២ រួមមាន៖ សេចក្តីចម្លងសំបុត្រកំណើត ឬសេចក្តីចម្លងសំបុត្របញ្ជាក់កំណើត និងសៀវភៅស្នាក់នៅ ឬសៀវភៅគ្រួសារ ឬលិខិតបញ្ជាក់ទីលំនៅ។

ចំណែក ពលរដ្ឋមានអត្តសញ្ញាណប័ណ្ណផុតសុពលភាព ត្រូវភ្ជាប់មកជាមួយនូវអត្តសញ្ញាណប័ណ្ណសញ្ជាតិខ្មែរដែលហួសសុពលភាព ឬមានសុពលភាពតិចជាង ១៨០ថ្ងៃ។ ករណីផ្លាស់ប្តូរអាស័យដ្ឋាន ត្រូវភ្ជាប់ជាមួយនូវសៀវភៅស្នាក់នៅ ឬសៀវភៅគ្រួសារ ឬលិខិតបញ្ជាក់ទីលំនៅ នៃលំនៅឋានថ្មី។

គួរបញ្ជាក់ផងដែរថា អត្តសញ្ញាណប័ណ្ណសញ្ជាតិខ្មែរ ត្រូវផ្តល់ជូនពលរដ្ឋខ្មែរគ្រប់រូប ដែលមានអាយុចាប់ពី ១៥ឆ្នាំឡើងទៅ។ កន្លងមក មានប្រជាពលរដ្ឋខ្មែរជិត ១៣លាននាក់ បានបំពេញបែបបទ និងទទួលបានអត្តសញ្ញាណប័ណ្ណសម្រាប់ប្រើប្រាស់រួចទៅហើយ។ អគ្គនាយកដ្ឋានអត្តសញ្ញាណកម្ម ជំរុញឱ្យពលរដ្ឋយកចិត្តទុកដាក់ និងរួសរាន់ទៅបំពេញបែបបទស្នើសុំអត្តសញ្ញាណប័ណ្ណសញ្ជាតិខ្មែរ ដើម្បីប្រើប្រាស់ឱ្យបានគ្រប់ៗគ្នា៕