ភ្នំពេញ៖ រាជរដ្ឋាភិបាល បានកំណត់វិធានការក្នុងការបង្ការហានិភ័យចំនួន៣ ដើម្បីអភិវឌ្ឍន៍សេដ្ឋកិច្ចក្រៅប្រព័ន្ធ និងបង្ការដល់ការរាំងស្ទះការអនុវត្ត នៅក្នុងយុទ្ធសាស្រ្តជាតិ ស្តីពីការអភិវឌ្ឍសេដ្ឋកិច្ចក្រៅប្រព័ន្ធឆ្នាំ២០២៣-២០២៨។

ហានិភ័យធំៗមានចំនួន៣ នោះ រួមមាន៖ ទី១. ហានិភ័យផ្នែកសារពើពន្ធ៖ សេដ្ឋកិច្ចក្រៅប្រព័ន្ធ មានទំហំធំ ការគាំពារ និងគាំទ្រ ព្រមទាំងការកាត់បន្ថយចំណាយទាំងថ្លៃសេវានិងប្រាក់ពន្ធ ដើម្បីជំរុញឱ្យមានការចូលរួមក្នុងប្រព័ន្ធ អាចនាំឱ្យមានហានិភ័យដល់សារពើពន្ធ ទាំងការចំណាយ និងចំណូល ខណ:ពេលដែលរាជរដ្ឋាភិបាលត្រូវការធនធានយ៉ាងចាំបាច់ទាំងក្នុងបរិបទតំបន់និងសកលនាពេលបច្ចុប្បន្ន។ ជាមួយគ្នានេះ រាជរដ្ឋាភិបាល បានបញ្ចៀសនូវការរីកធំឡើងៗក្នុងការគាំពារ ដោយជំនួសមកវិញលើការអភិវឌ្ឍសេដ្ឋកិច្ចក្រោមគោលការណ៍ ដែលមិនបង្រៀនឱ្យប្រជាជនរស់នៅពឹងផ្អែកលើរដ្ឋ។

ទី២. លទ្ធភាពក្នុងការទាញយកប្រយោជន៍ពីការគាំពារ និងការគាំទ្ររបស់រាជរដ្ឋាភិបាល៖ វិធានការក្នុងការអនុវត្តសេដ្ឋកិច្ចក្រៅប្រព័ន្ធ អាចមិនទៅដល់ប្រជាជនដែលនៅឆ្ងាយ និងងាយរងគ្រោះនោះទេ ដោយសារកត្តាធនធានថវិកា សមត្ថភាព ឬចំណេះដឹង ព័ត៌មាន បណ្តាញ ឬទីតាំងអំណោយផលរបស់ប្រជាជនផ្ទាល់។ ទន្ទឹមនឹងនេះ ត្រូវមានការចូលរួមយ៉ាងសកម្មពីសំណាក់គ្រប់ភាគីពាក់ព័ន្ធនៅគ្រប់លំដាប់ថ្នាក់ ដើម្បីធានាវិសាលភាពគ្របដណ្តប់នៃការគាំទ្រឱ្យបានជាអតិបរមា ដោយរាជរដ្ឋាភិបាលនឹងធានាឱ្យបាននូវតម្លាភាព និងសមធម៌។

ទី៣. ការកើតឡើងនៃប្រភេទការងារនិងអាជីវកម្មថ្មី ក្នុងសេដ្ឋកិច្ចក្រៅប្រព័ន្ធ៖ រាល់ព្រឹត្តិការណ៍ដែលប៉ះពាល់ដល់វិស័យសេដ្ឋកិច្ច តែងតែកើតឡើងនូវសកម្មភាពសេដ្ឋកិច្ចថ្មីៗ ឬពង្រីកសកម្មភាពសេដ្ឋកិច្ចដែលមានស្រាប់ពិសេសវិបត្តិនៃជំងឺកូវីដ-១៩ បានជំរុញឱ្យមានការលេចចេញនូវប្រភេទការងារនិងអាជីវកម្មដែលគ្មានទីតាំងជាក់លាក់។ ការវិវត្តនៃស្ថានភាពសេដ្ឋកិច្ចជាតិ តំបន់ និងសកលនេះ ទាមទារឱ្យមានការតាមដានជាប្រចាំដើម្បីត្រៀមខ្លួន ឱ្យកាន់តែប្រសើរក្នុងការគាំទ្រ និងស្រូបយកប្រភេទការងារនិងអាជីវកម្មថ្មីៗចូលក្នុងប្រព័ន្ធ៕