ព្រះមហាក្សត្រ នឹងយាងសម្ពោធ«ស្ពានហាលខាងលិចប្រាសាទអង្គរវត្ត»ជាផ្លូវការ នៅថ្ងៃទី០៤ វិច្ឆិកាខាងមុខ

ភ្នំពេញ៖ ព្រះករុណាព្រះបាទសម្តេច ព្រះបរមនាថ នរោត្តម សីហមុនី នឹងយាងជាអធិបតីភាពដ៏ខ្ពង់ខ្ពស់ក្នុងព្រះរាជពិធីសម្ពោធដាក់ឱ្យប្រើប្រាស់ជាផ្លូវការ«ស្ពានហាលខាងលិចប្រាសាទអង្គរវត្ត» នៅថ្ងៃទី០៤ ខែវិច្ឆិកា ឆ្នាំ២០២៣ខាងមុខ។

បើតាមអាជ្ញាធរជាតិអប្សរា គម្រោងអប្សរា និងជួសជុលស្ពានហាលខាងលិចប្រាសាទអង្គរវត្តដែលបានបញ្ចប់រួចរាល់ជាស្ថាពរនេះ ស្ថិតនៅក្រោមកិច្ចសហការរវាងអាជ្ញាធរជាតិអប្សរា និងសាកលវិទ្យាល័យសូហ្វីយ៉ា នៃប្រទេសជប៉ុន។

ដើម្បីគ្រប់គ្រងនូវលំហូរការទស្សនានៅប្រាសាទអង្គរវត្តឱ្យបានល្អ ក្រោយព្រះរាជពិធីសម្ពោធជាផ្លូវការហើយ អាជ្ញាធរជាតិអប្សរា នឹងកំណត់ទិសដៅទស្សនាដោយឱ្យប្រើប្រាស់ស្ពានខាងលិចប្រាសាទអង្គរវត្ត ជាច្រកចូលសម្រាប់ការទស្សនា។ សម្រាប់ស្ពានបណ្តែតទឹកប្រាសាទអង្គរវត្ត នៅបន្តប្រើប្រាស់ជាច្រកចេញសម្រាប់ការទស្សនា។ នេះបើតាមសេចក្តីជូនដំណឹងរបស់អាជ្ញាធរជាតិអប្សរា កាលពីថ្ងៃទី១៩ ខែតុលា ឆ្នាំ២០២៣នេះ៕