ភ្នំពេញ៖ សញ្ញាបណ្ណ ឬមូលបត្របំណុល គឺជាប្រភេទកម្ចី ដែលអាចជំនួសឱ្យកម្ចីធនាគារ។ ចំពោះអ្នកបោះផ្សាយសញ្ញាបណ្ណ គឺជាអ្នកខ្ចី រីឯអ្នកវិនិយោគលើសញ្ញាបណ្ណ គឺជាអ្នកផ្តល់កម្ចី។ សញ្ញាបណ្ណ មានភាពបត់បែនជាងកម្ចីធនាគារ ទៅលើលក្ខខណ្ឌ, ទំហំ, ឥណប្រតិទាន និងអត្រាការប្រាក់។ នេះតាមការចុះផ្សាយរបស់សាជីវកម្មធានាឥណទានកម្ពុជា CGCC កាលពីថ្ងៃទី២៧ ខែសីហា ឆ្នាំ២០២៤។

សាជីវកម្មធានាឥណទានកម្ពុជា បញ្ជាក់ថា «សញ្ញាបណ្ណ» នឹងផ្តល់ភាពងាយស្រួលដល់អ្នកបោះផ្សាយ (អ្នកខ្ចី) ដែលអនុញ្ញាតឱ្យពួកគេអាចកំណត់លក្ខខណ្ឌនៃសញ្ញាបណ្ណដូចជា ប្រាក់ដើម Par Value / Face Value អត្រាការប្រាក់ និងរយៈពេល។ ដោយឡែក អ្នកវិនិយោគលើសញ្ញាបណ្ណ ទិញសញ្ញាបណ្ណពីអ្នកបោះផ្សាយ ដែលសន្យាទូទាត់ការប្រាក់ (គូប៉ុង) និងប្រាក់ដើម ដល់អ្នកទិញសញ្ញាបណ្ណ ក្នុងអំឡុងពេលឥណប្រតិទាននៃសញ្ញាបណ្ណ៕