ភ្នំពេញ៖ និយ័តករទូរគមនាគមន៍កម្ពុជា(ន.ទ.ក) បានបិទខ្ទប់ការចូលមើលគេហទំព័រ/អាសយដ្ឋានអាយភី(IP Address) សរុបចំនួន៩ ៧៧៧ ដែលផ្សព្វផ្សាយពីល្បែងស៊ីសងអនឡាញ រូបភាព វីដេអូអាសអាភាសកុមារ ព័ត៌មានក្លែងបន្លំ និងការបោកបញ្ឆោត។ និយ័តករទូរគមនាគមន៍ បានបញ្ជាក់ថា ការផ្សព្វផ្សាយមាតិកាខុសច្បាប់ទាំងនេះ នឹងបង្កឱ្យមានផលប៉ះពាល់យ៉ាងធ្ងន់ធ្ងរដល់សន្តិសុខ សណ្តាប់ធ្នាប់សង្គម និងអ្នកប្រើសេវាទូរគមនាគមន៍។

ក្នុងចំណោមគេហទំព័រ/អាសយដ្ឋានអាយភីទាំង៩ ៧៧៧ មាន ៧ ៣២៣គេហទំព័រ/អាសយដ្ឋានអាយភី ដែលស្ថាប័នមានសមត្ថកិច្ចពាក់ព័ន្ធ និងប្រតិបត្តិករទូរគមនាគមន៍ បានបិទខ្ទប់នាពេលកន្លងមក។ ចំណែកគេហទំព័រខុសច្បាប់ចំនួន ១ ៩៦៥ ត្រូវបានបិទខ្ចប់ការចូលមើល កាលពីថ្ងៃទី៦ ខែសីហា ឆ្នាំ២០២៤ និងគេហទំព័រចំនួន ៤៨៩ផ្សេងទៀត ន.ទ.ក បានចាត់វិធានការបិទខ្ទប់ កាលពីថ្ងៃទី៩ ខែសីហា ឆ្នាំ២០២៤។

និយ័តករទូរគមនាគមន៍ អំពាវនាវឱ្យសាធារណជនចូលរួមលើកកម្ពស់សន្តិសុខ សណ្តាប់ធ្នាប់សង្គម និងបង្ការខ្លួនពីអំពើខាងលើ តាមរយៈការរាយការណ៍មកកាន់លេខទូរសព្ទ ៦៧៨៩រៀងរាល់ម៉ោងធ្វើការ ឬផ្ញើសារមកកាន់អ៊ីម៉ែល [email protected] ប្រសិនបើទទួលបានការផ្សព្វផ្សាយសារ និងមាតិកាខុសច្បាប់ ឬដឹងអំពីករណីនៃការផ្សព្វផ្សាយទាំងនេះ។ តាមការចុះផ្សាយរបស់ ន.ទ.ក. រាល់ការរាយការណ៍របស់សាធារណជន ន.ទ.ក. នឹងរក្សាជាការសម្ងាត់៕