ភ្នំពេញ៖ ក្នុងខែកក្កដា ឆ្នាំ២០២៤ ប្រទេសចិន នៅតែស្ថិតក្នុងលំដាប់លេខរៀងទី១ ដែលបានបណ្តាក់ទុនវិនិយោគនៅកម្ពុជា ច្រើនជាងគេក្នុងចំនួន ៦៨,០៦% នៃទុនវិនិយោគសរុប ខណៈដែលការវិនិយោគក្នុងស្រុកមានត្រឹមតែ ១៤,២៤% និងការវិនិយោគពីប្រទេសផ្សេងៗ មានចំនួន ១៧,៦៩% នៃទុនវិនិយោគសរុប។ នេះបើតាមការចុះផ្សាយរបស់ក្រុមប្រឹក្សាអភិវឌ្ឍន៍កម្ពុជា(CDC) នាថ្ងៃទី៧ សីហា។

ក្នុងខែកក្កដានៃឆ្នាំ២០២៤នេះ CDC បានបានអនុម័តគម្រោងចំនួន៤៤ ដែលមានទុនវិនិយោគសរុបប្រមាណជាង ៣៩៦លានដុល្លារ អាចបង្កើតការងារបានចំនួន ២៥ពាន់កន្លែង។ គម្រោងចំនួន៤៤ ដែល CDC បានអនុម័តនេះ មានគម្រោងថ្មីចំនួន ៤១គម្រោង និងគម្រោងពង្រីកផលិតកម្មចំនួន ៣គម្រោង ដែលក្នុងនោះមានគម្រោងវិនិយោគនៅទីតាំងស្ថិតនៅក្រៅតំបន់សេដ្ឋកិច្ចពិសេសមានចំនួន ៣១គម្រោង និងគម្រោងវិនិយោគដែលមានទីតាំងក្នុងតំបន់សេដ្ឋកិច្ចពិសេសមានចំនួន ១៣គម្រោង។

CDC បានឱ្យដឹងថា គម្រោងវិនិយោគដែលមានភាពលេចធ្លោជាងគេនៅក្រៅតំបន់សេដ្ឋកិច្ចពិសេស គឺគម្រោងពង្រីកផលិតកម្មរបស់គម្រោងវិនិយោគបង្កើតរោងចក្របោកគក់ ជ្រលក់ពណ៌ និងបោះពុម្ព ដែលស្ថិតនៅភូមិក្រាំងទា ឃុំព្រះនិព្វាន្ត ស្រុកគងពិសី ខេត្តកំពង់ស្ពឺ ក្នុងទំហំវិនិយោគបន្ថែមជាង ២១លានដុល្លារ អាចបង្កើតការងារបន្ថែមបានចំនួន ៧៤កន្លែង។

ចំពោះ គម្រោងដែលលេចធ្លោក្នុងតំបន់សេដ្ឋកិច្ចពិសេស មានដូចជា៖ ទី១. គម្រោងបង្កើតតំបន់សេដ្ឋកិច្ចពិសេស កោះកុង ចេជាង ដែលមានទីតាំងនៅភូមិអូរជ្រៅ ភូមិផ្លោងនៃឃុំបឹងព្រាវ និងភូមិឈើនាងនៃឃុំជ្រោយស្វាយ ស្រុកស្រែអំបិល ខេត្តកោះកុង ដែលទុនវិនិយោគ ១០០លានដុល្លារ និងបង្កើតការងារបាន ៣៣១កន្លែង។ ទី២. គម្រោងវិនិយោគបង្កើតរោងចក្រផលិតសារធាតុកែច្នៃចំណីអាហារ (Galatin) ដែលមានទីតាំងស្ថិតនៅក្នុងតំបន់សេដ្ឋកិច្ចពិសេស កោះកុង ចេជាង ក្នុងទុនវិនិយោគជាង ២៦លានដុល្លារ និងអាចបង្កើតការងារបានចំនួន ១៩៤កន្លែង៕