ភ្នំពេញ៖ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានស្នើឱ្យនិស្សិតអាហារូបករណ៍ទាំងអស់ ដែលទៅសិក្សានៅប្រទេសឆែក និងអាល្លឺម៉ង ធ្វើជាទូតសុឆន្ទៈតំណាងឱ្យកម្ពុជាក្នុងការបង្ហាញភាពវិជ្ជមាន និងឱកាសវិនិយោគនៅកម្ពុជា ដល់ជនបរទស។ ឯកឧត្តម ហេង សួរ បានលើកឡើងដូច្នេះក្នុងជំនួបជាមួយនិសិ្សតជ័យលាភី ១៧រូប កាលពីទី២៣ ខែកក្កដា ឆ្នាំ២០២៤។

ក្រៅពីឱកាសវិនិយោគ ឯកឧត្តម ហេង សួរ ក៏បានស្នើឱ្យនិស្សិតទាំងអស់បង្ហាញពីវឌ្ឍនភាពសង្គម និងវប្បធម៌ប្រពៃណីដ៏ផូផង់របស់កម្ពុជាដល់បរទសផងដែរ។ ក្នុងកិច្ចជំនួបដែលធ្វើឡើងនៅទីស្តីការក្រសួងការងារនេះ មានគោលបំណងឱ្យនិស្សិតអាហារូបករណ៍ទៅសិក្សានៅបរទេសទទួលអនុសាសន៍ និងបទពិសោធចាកចេញទៅសិក្សានៅបរទេស ដើម្បីក្រេបយកចំណេះដឹង និងបទពិសោធបន្ថែមពីសាធារណរដ្ឋឆែក និងសហព័ន្ធអាល្លឺម៉ង់ក្នុងតំបន់អឺរ៉ុប ក្នុងទិសដៅរួមចំណែកអភិវឌ្ឍន៍សង្គមជាតិបន្ថែមទៀត៕