ភ្នំពេញ៖ អង្គការកម្មសិទ្ធិបញ្ញាពិភពលោក (WIPO) និងនាយកដ្ឋានកម្មសិទ្ធិបញ្ញា នឹងពិភាក្សាស្រាវជ្រាវ បន្តអំពីសក្តានុពលក្តាមថ្មកោះកុង ដើម្បីចុះបញ្ជីជាម៉ាកសម្គាល់ភូមិសាស្រ្តទំនិញ។ ការយល់ព្រមសិក្សាបន្ថែមនេះ ធ្វើឡើងបន្ទាប់ពី ឯកឧត្តម អ៊ុក ប្រជា រដ្ឋលេខាធិការក្រសួងពាណិជ្ជកម្ម ស្នើសុំលោកស្រី WANG Binying អគ្គនាយករងនៃអង្គការ WIPO បន្តស្រាវជ្រាវចុះបញ្ជីក្តាមថ្មកោះកុងជាម៉ាកសម្គាល់ភូមិសាស្រ្តទំនិញ។

ក្រៅពីសំណើបន្តសិក្សាលើក្តាមថ្មកោះកុង ឯកឧត្តម អ៊ុក ប្រជា ក៏បានស្នើសុំឱ្យអង្គការ WIPO បង្កើតម៉ាកសមូហភាព និងម៉ាកវិញ្ញាត្តិកម្ម (Certification Mark) សម្រាប់ផលិតផលអង្កររបស់កម្ពុជាផងដែរ។ លើសពីនេះ ក្នុងជំនួបទ្វេភាគី ដែលធ្វើឡើងកាលពីថ្ងៃទី១៦ ខែកក្កដា ឆ្នាំ២០២៤ នៅទីក្រុងហ្សឺណែវ ប្រទេសស្វ៊ីស ឯកឧត្តម អ៊ុក ប្រជា ក៏បានអរគុណអង្គការ WIPO ដែលបានសហការជាមួយកម្ពុជា តាមរយៈការផ្តល់ជំនួយបច្ចេកទេសក្នុងការរៀបចំច្បាប់ ការអភិវឌ្ឍប្រព័ន្ធកម្មសិទ្ធិបញ្ញានៅកម្ពុជា និងការផ្តល់ប្រព័ន្ធរដ្ឋបាលកម្មសិទ្ធិឧស្សាហកម្ម(IPAS)។

គួរបញ្ជាក់ថា នាយកដ្ឋានកម្មសិទ្ធិបញ្ញា និងអ្នកជំនាញរបស់អង្គការ WIPO បានស្រាវជ្រាវអំពីសក្តានុពលក្តាមថ្មកោះកុងចំនួន ៣លើករួចមកហើយ ក្រោមកម្មវិធី Post Covid ពាក់ព័ន្ធនឹងការចុះបញ្ជីម៉ាកសម្គាល់ភូមិសាស្រ្តទំនិញក្តាមថ្មកោះកុងនេះ៕