សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានឱ្យតាមក្រសួងស្ថាប័នពិនិត្យនិងកែសម្រួលគម្រោងមួយចំនួន ដែលមិនទាន់ចាំបាច់ក្នុងការអនុវត្ត រដ្ឋសន្សំលុយបានជាង២០០លានដុល្លារ ពីគម្រោងផែនការចំណាយអស់នោះ ភាគច្រើនជាគម្រោងសិក្សាស្រាវជា្រវដែលអាចពន្យារពេលបាន។

«ថ្ងៃមុន ខ្ញុំគ្រាន់តែឲ្យកែសម្រួល ព្យួរការចំណាយទៅលើកិច្ចការមិនសំខាន់មួយចំនួន ខ្ញុំសន្សំបានជាង២០០លានដុល្លារ សម្រាប់ឆ្នាំ២០២៣នេះ»។ សម្តេចធិបតី ហ៊ុន ម៉ាណែត នាយករដ្ឋមន្ត្រី ថ្លែងយ៉ាងដូច្នេះក្នុងពិធីអបអរសាទរទិវាគ្រូបង្រៀន ៥ តុលា ក្រោមប្រធានបទ៖«គ្រូបង្រៀនជាសសរស្ដម្ភ នៃកំណែទម្រងសាលារៀនឆ្ពោះទៅរកឧត្ដមភាព» នៅថ្ងៃទី០៥ ខែតុលា ឆ្នាំ២០២៣ នាវិទ្យាស្ថានបច្ចេកវិទ្យាកម្ពុជា។

សម្ដេចធិបតី ហ៊ុន ម៉ាណែត បញ្ជាក់ថា ថវិកាជាង២០០លានដុល្លារនេះ រដ្ឋាភិបាល យកមកបង្កើនថវិកា ក្នុងការគាំពារសង្គម ជាពិសេសក្នុងស្ថានភាពគ្រោះទឹកជំនន់នេះតែម្តង។ សម្តេចធិបតី បានបន្ថែមថា ថវិកាទាំងនេះ មានប៉ះពាល់ដល់មន្ដ្រីឡើយ គ្រាន់តែជាគម្រោងសិក្សាមួយចំនួនមិនទាន់ចាំបាច់ប៉ុណ្ណោះ ដែលអាចព្យួរឬពន្យារពេលក្នុងការអនុវត្តសិន ដើម្បីបង្វែរថវិកាទាំងនោះទៅជួយប្រជាពលរដ្ឋ ដាក់ឱ្យចំគោលដៅ នៃការកំណែទម្រង់៕