ភ្នំពេញ៖ កម្ពុជា ទទួលបានជោគជ័យលើការភ្ញាស់«កូនត្រីគល់រាំង» ជាលើកដំបូងនៅវេលាម៉ោង៣ព្រឹក ថ្ងៃទី២៧ ខែឧសភា ឆ្នាំ២០២៤ ក្រោយពីបានចិញ្ចឹមបំប៉នត្រីមេពូជ ញី ឈ្មោលត្រីគល់រាំង រហូតដល់ពេញវ័យដែលចំណាយពេលអស់រយៈពេលរហូតដល់ទៅជិត១០ឆ្នាំ។

បើតាមការចុះផ្សាយរបស់ក្រសួងកសិកម្ម រុក្ខាប្រមាញ់ និងនេសាទ ចេញផ្សាយនាថ្ងៃទី២៧ ឧសភា លទ្ធផលបង្កាត់ និងភ្ញាស់កូនត្រីគល់រាំងរបស់កម្ពុជា ជាលើកដំបូងនេះ ធ្វើឡើងដោយក្រុមស្រាវជ្រាវបច្ចេកទេសវារីវប្បកម្ម នៃវិទ្យាស្ថានជាតិស្រាវជ្រាវ និងអភិវឌ្ឍន៍វារីវប្បកម្មទឹកសាប សម្ដេចតេជោ ហ៊ុន សែន។ គួរបញ្ជាក់ថា ត្រីគល់រាំង គឺជានិមិត្តរូបមច្ឆជាតិរបស់កម្ពុជាដែលកំពុងបង្កើនកិច្ចគាំពារ និងជាប្រភេទត្រីកម្រ ដែលប្រឈមនឹងការផុតពូជ៕