ភ្នំពេញ៖ ឯកឧត្ដម គី ច័ន្ទរំដួល អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានចុះពិនិត្យ ដោះស្រាយបញ្ហាប្រឈម និងស្វែងរកទីផ្សារលក់ ឱ្យសហគមន៍កសិកម្មផលិតផលមៀនប៉ៃលិន នៅខេត្តប៉ៃលិន កាលពីថ្ងៃទី១៨ ឧសភា។ នេះបើតាមការចុះផ្សាយរបស់ក្រសួងកសិកម្ម កាលពីថ្ងៃទី១៨ ខែឧសភា ឆ្នាំ២០២៤។

ការចុះពិនិត្យដល់សហគមន៍ ស្ថិតនៅភូមិអូរតាពុក សង្កាត់ទួលល្វា ក្រុងប៉ៃលិន ខេត្តប៉ៃលិន ដែលមានការចូលរួមពីប្រធានមន្ទីរកសិកម្ម ខេត្តប៉ៃលិន ព្រមទាំងមន្ត្រីរាជការមន្ទីរកសិកម្ម ខេត្តប៉ៃលិននេះ ធ្វើឡើងក្នុងគោលបំណង រួមមាន៖ ការរៀបចំបង្កើតសមាគមថ្មីមួយ មានសមាជិក៣០នាក់ ដែលនឹងធ្វើការដោយមានជោគវាសនារួមគ្នា, ជំរុញឱ្យសហគមន៍ មានសាមគ្គីភាពខិតខំប្រឹងប្រែង បង្កើនសមត្ថភាពដាំដុះ, ស្វែងយល់ និងជួយដោះស្រាយបញ្ហាប្រឈម ដែលសហគមន៍បានជួបប្រទះដូចជាបញ្ហាទឹក ធាតុចូលកសិកម្មថ្លៃជាដើម និងជួយស្វែងរកទីផ្សារសម្រាប់លក់៕