ភ្នំពេញ៖ ធុរជនមកពីឥណ្ឌា ចំនួន ៣ស្ថាប័នពាណិជ្ជកម្ម និងក្រុមហ៊ុនឯកជនពហុវិស័យ ចំនួន១២ រួមមានសភាពាណិជ្ជកម្មឥណ្ឌា មកទស្សនកិច្ចសិក្សាស្វែងយល់ពីសក្តានុពលវិនិយោគ និងទេសចរណ៍នៅកម្ពុជា។ នេះបើតាមការចុះផ្សាយរបស់ ក្រសួងទេសចរណ៍ កាលពីថ្ងៃទី២០ ខែមីនា ឆ្នាំ២០២៥។

ក្នុងជំនួបពិភាក្សាការងារជាមួយ ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍ ប្រតិភូស្ថាប័ន និងក្រុមហ៊ុនខាងលើ បានលើកឡើងពីមូលហេតុដែលមកទស្សនកិច្ចនៅកម្ពុជា ព្រោះកត្តាសុខសន្តិភាព ស្ថិរភាពនយោបាយ និងសុខសុវត្ថិភាពដ៏ល្អដែលកម្ពុជាមាន ព្រមទាំងសក្តានុពលវិនិយោគ និងទេសចរណ៍ផងដែរ ដែលជំរុញឱ្យសមាជិកសមាជិកាប្រតិភូមកធ្វើទស្សនកិច្ច នាពេលនេះ។

ទន្ទឹមនឹងនេះ ប្រតិភូ ក៏បានកោតសរសើរអំពីសក្តានុពលដ៏សំបូរបែបនៃទេសចរណ៍កម្ពុជា ពិសេសប្រាង្គប្រាសាទអង្គរវត្ត និងប្រាសាទដទៃទៀតនៅក្នុងខេត្តសៀមរាប។ ប្រតិភូ បេ្តជ្ញាពាំនាំនូវភាពអច្ឆរិយៈនៃបេតិកភណ្ឌទាំងអស់នេះ ដល់ក្រុមគ្រួសារ សហការី និងប្រជាពលរដ្ឋឥណ្ឌាទាំងអស់ ដើម្បីទាក់ទាញពួកគេមកទស្សនាកម្ពុជា ឱ្យបានមួយដងក្នុងមួយជីវិត៕