ភ្នំពេញ៖ កូរ៉េ បង្កើនជំនួយអភិវឌ្ឍន៍ផ្លូវការបន្ថែមទៀតនៅកម្ពុជា តាមរយៈហិរញ្ញប្បទានឥតសំណងរបស់ទីភ្នាក់ងារសហប្រតិបត្តការអន្តរជាតិកូរ៉េ (KOICA) និងឥណទានសម្បទានតាមរយៈមូលនិធិសហប្រតិបត្តិការអភិវឌ្ឍសេដ្ឋកិច្ច (EDCF Loan)។ នេះជាការលើកឡើងរបស់ឯកឧត្តម ហាន់ ដុកស៊ូ នាយករដ្ឋមន្រ្តី នៃសាធារណរដ្ឋកូរ៉េ ក្នុងជំនួបជាមួយសម្តេចធិបតី ហ៊ុន ម៉ាណែត។

ក្នុងជំនួបនេះ ឯកឧត្តម ហាន់ ដុកស៊ូ បានលើកឡើងថា កម្ពុជា ជាទិសដៅនៃការវិនិយោគ និងជាទីផ្សារដែលមានសក្ដានុពលសម្រាប់វិស័យឧស្សាហកម្មកូរ៉េ ជាពិសេសគឺឧស្សាហកម្មយានយន្ត។ នាយករដ្ឋមន្រ្តី នៃសាធារណរដ្ឋកូរ៉េរូបនេះ ក៏បានបង្ហាញការគាំទ្រចំពោះគំនិតផ្តួចផ្តើមរបស់កម្ពុជា ក្នុងការបង្កើតតំបន់សេដ្ឋកិច្ចពិសេសសម្រាប់ក្រុមហ៊ុនកូរ៉េ និងការជំរុញឱ្យមានយន្តការនៃការពិគ្រោះយោបល់រវាងសមាគមធុរកិច្ចកូរ៉េនៅកម្ពុជា។

តាមការចុះផ្សាយរបស់សម្តេចធិបតី ហ៊ុន ម៉ាណែត នាថ្ងៃទី១៦ ខែឧសភា ឆ្នាំ២០២៤ បានបញ្ជាក់ថា វិស័យឯកជនមានសារសំខាន់ណាស់ក្នុងការអភិវឌ្ឍប្រទេសកម្ពុជា ដោយការពង្រឹងតួនាទីរបស់វិស័យឯកជននេះហើយនឹងធ្វើឱ្យការអភិវឌ្ឍសង្គម-សេដ្ឋកិច្ចកម្ពុជាកាន់តែរីកចម្រើនបន្ថែមទៀត។ សម្តេចធិបតី ហ៊ុន ម៉ាណែត បានលើកឡើងថា ការកសាង និងអភិវឌ្ឍន៍សង្គម-សេដ្ឋកិច្ចកម្ពុជានាពេលកន្លងមក គឺមានការចូលរួមចំណែកយ៉ាងសកម្មរបស់រដ្ឋាភិបាលកូរ៉េ៕