ភ្នំពេញ៖ សម្ដេចតេជោ ហ៊ុន សែន ប្រធានក្រុមឧត្តមប្រឹក្សាផ្ទាល់ព្រះមហាក្សត្រ បានទៅទស្សនកិច្ចវិទ្យាស្ថានកសិកម្មត្រូពិច នៅទីក្រុងវិនឆាង ខេត្តហៃណាន ប្រទេសចិន នារសៀលថ្ងៃទី២៧ ខែមីនា ឆ្នាំ២០២៤ ក្នុងឱកាសដែលសម្តេចតេជោ ចូលរួមក្នុងវេទិកា«បូអាវប្រចាំឆ្នាំ» នៅខេត្តហៃណាននេះ ចាប់ពីថ្ងៃទី២៧-២៩ ខែមីនា ឆ្នាំ២០២៤នេះ។

ក្នុងវេទិកា«បូអាវប្រចាំឆ្នាំ» សម្តេចតេជោ ហ៊ុន សែន បានថ្លែងសុន្ទរកថានៅក្នុងពិធីបើកសន្និសីទ ក្រោមមូលបទ«អាស៊ីនិងពិភពលោក៖ បញ្ហាប្រឈម និងការទទួលខុសត្រូវរួម»ផងដែរ។ វេទិកានេះ មានថ្នាក់ដឹកនាំរដ្ឋាភិបាល ធុរកិច្ច ស្ថាប័នសិក្សាស្រាវជ្រាវ អង្គការអន្តរជាតិ និងអង្គការតំបន់នានា ដើម្បីពិភាក្សាអំពីបញ្ហាសំខាន់ៗដែលកំពុងប្រឈម និងជំរុញកិច្ចសហប្រតិបត្តិការអន្តរជាតិ។

ក្រៅពីចូលរួមទស្សនកិច្ចនៅវិទ្យាសាស្ត្រកសិកម្មត្រូពិចចិន (CATAS) និងវេទិកា«បូអាវប្រចាំឆ្នាំ» សម្តេចតេជោ ហ៊ុន សែន ក៏នឹងដឹកនាំប្រតិភូជាន់ខ្ពស់ និងអ្នកជំនួញជាច្រើនរូបរបស់កម្ពុជា ជួបជាមួយនឹងថ្នាក់ដឹកនាំជាន់ខ្ពស់ចិន ដូចជា ឯកឧត្តម ចាវ ឡីជី ប្រធានគណៈកម្មាធិការអចិន្ត្រៃយ៍ នៃសភាតំណាងប្រជាជនចិន និងឯកឧត្តម នាយឧត្តមសេនីយ៍ ហឺ វ័យ ទុង សមាជិកការិយាល័យនយោបាយមជ្ឈិមបក្ស និងជាអនុប្រធានទី២ នៃគណៈកម្មាធិការយោធាមជ្ឈិមបក្ស និងឯកឧត្តម ហ្នឹង ហ្វី លេខាធិការនៃគណៈកម្មាធិការបក្សកុម្មុយនីស្តចិន ខេត្តហៃណាន ទៀតផង៕