ភ្នំពេញ៖ ស្ថាប័នចំនួន៩ នឹងបើកឱ្យក្រុមហ៊ុន ស្ថាប័ន អង្គភាព ប្រកួតដេញថ្លៃគម្រោងជលផលសមុទ្រ និងតំបន់ឆ្នេរប្រកបដោយចីរភាព។ គម្រោងនេះ ត្រូវបានបង្កើតឡើងក្នុងគោលបំណងស្តារឡើងវិញនូវកំណើនផលស្ដុកនៃជលផលតំបន់ក្បែរឆ្នេរ តាមរយៈការស្ដារប្រព័ន្ធអេកូឡូស៊ីស្មៅសមុទ្រ ព្រៃកោងកាងនិងការបង្វែរមុខរបរពីការនេសាទមកធ្វើវារីវប្បកម្មក្នុងសមុទ្រជាលក្ខណៈពាណិជ្ជកម្មវិញ។

គម្រោងជលផលសមុទ្រ និងតំបន់ឆ្នេរប្រកបដោយចីរភាព មានយុទ្ធនាការផ្សព្វផ្សាយតាមសហគមន៍, សិក្ខាសាលាអប់រំស្ដីអំពីការប្រកបធុរកិច្ចប្រកបដោយចីរភាព, ការសិក្សាស្រាវជ្រាវលទ្ធភាពទាក់ទងទៅនឹងជលផលសមុទ្រ, កម្មវិធីជំនួបប្រជុំដៃគូពាក់ព័ន្ធ ដែលមានសកម្មភាពនៅតាមតំបន់សមុទ្រ,កម្មវិធីប្រកួតប្រជែងធុរកិច្ចតាមតំបន់សហគមន៍, កម្មវិធីផ្សារភ្ជាប់ទីផ្សារ, កម្មវិធីគាំទ្រការបណ្ដុះបណ្ដាលស្ដង់ដារសុវត្ថិភាពចំណីអាហារ, កម្មវិធីហេដ្ឋារចនាសម្ព័ន្ធសហគមន៍ និងកម្មវិធីបណ្តុះបណ្តាលសមត្ថភាពសហគ្រិនដល់សហគមន៍។

ស្ថាប័នចំនួន៩ ដែលលើកឡើងខាងលើ មានដូចជា៖ ក្រសួងបរិស្ថាន, ក្រសួងសេដ្ឋកិច្ច និងហិរញ្ញវត្ថុ, ក្រសួងកសិកម្ម រុក្ខាប្រមាញ់ និងនេសាទ, ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍, សហគ្រិនខ្មែរ និងធនាគារអភិវឌ្ឍអាស៊ី ជាដើម។ គម្រោង ដែលនឹងអនុវត្តរយៈពេល ៥ឆ្នាំ ចាប់ពីឆ្នាំ២០២៤ ដល់ឆ្នាំ ២០២៩នេះ នឹងធ្វើឱ្យអាជីវកម្មនៅតំបន់ឆ្នេរ បង្កើតនិងធ្វើពាណិជ្ជកម្ម ក្នុងខេត្តចំនួន៤ គឺ ខេត្តកំពត, ខេត្តកែប, ខេត្តកោះកុង និងខេត្តព្រះសីហនុ។

គួរជម្រាបថា ក្រុមហ៊ុន, ស្ថាប័ន, អង្គភាព និងក្រុមទីប្រឹក្សា របស់លោក-លោកស្រី អាចដាក់ពាក្យដេញថ្លៃអនុវត្តគម្រោងទាំងនេះ តាមរយៈ QR Code, សារអេឡិចត្រូនិច [email protected] និងលេខទូរស័ព្ទ៖ ០២៣ ៩០០ ៨៥៥៕