ភ្នំពេញ៖ ឯកឧត្តម តូច ប៊ុនហួរ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ណែនាំដល់មន្រ្តីពាក់ព័ន្ធទាំងអស់ ត្រូវជំរុញការផ្លាស់ប្តូរពីការធ្វើកសិកម្មតាមបែបធម្មតា មកជាកសិកម្មពាណិជ្ជកម្ម និងបច្ចេកវិទ្យា ដោយយកមន្ត្រីមូលដ្ឋានជាកម្លាំងរុញច្រាន ដើម្បីធានាថា កសិករខេត្តបាត់ដំបង មានជីវភាពធូរធារ។

ឯកឧត្តម តូច ប៊ុនហួរ ក្នុងឱកាស ដឹកនាំក្រុមការងារ ជួបសំណេះសំណាលជាមួយសហគមន៍កសិកម្មមៀនរតនមណ្ឌល និងការកែច្នៃមៀនប៉ៃលិន នៅឃុំត្រែង និងចុះជួបម្ចាស់ចំការស្វាយចន្ទី នៅឃុំរស្មីសង្ហា ស្រុករតនមណ្ឌល ខេត្តបាត់ដំបង បានផ្តល់អនុសាសន៍ណែនាំ ដល់មន្រ្តីពាក់ព័ន្ធទាំងអស់ ត្រូវមានកាតព្វកិច្ចដោះបញ្ហាប្រឈមរបស់កសិករ ឱ្យទៅជាលទ្ធផលសេដ្ឋកិច្ចជាក់ស្តែងផងដែរ។

ឯកឧត្តម តូច ប៊ុនហួរ វាយតម្លៃខ្ពស់ចំពោះកិច្ចខិតខំប្រឹងប្រែងការដឹកនាំសហគមន៍ ដែលមានវឌ្ឍនភាពល្អប្រសើរ ជាពិសេសការកែច្នៃជាមៀនក្រៀមប៉ៃលិន សម្រាប់នាំចេញទៅទីផ្សារចិន។ គួរបញ្ជាក់ថា ជំនួបនោះក៏មានការចូលរួមពី ឯកឧត្តម សុខ វិសាល អនុរដ្ឋលេខាធិការ លោក យិន ច័ន្ទសុធី អគ្គនាយករងនៃអគ្គនាយកដ្ឋានកសិកម្ម, តំណាងមន្ទីរកសិកម្ម រុក្ខាប្រមាញ់ និងនេសាទ, ខេត្តបាត់ដំបង និងសហការី ព្រមទាំងការិយាល័យកសិកម្ម ធនធានធម្មជាតិ និងបរិស្ថានស្រុក និងមន្ត្រីកសិកម្មឃុំ៕