ភ្នំពេញ៖ ជំនួបផ្គូផ្គងអាជីវកម្មរវាងសមាជិករបស់ សមាគមសហគ្រិនវ័យក្មេងកម្ពុជា និងសមាគមជប៉ុន-កម្ពុជា ជាកត្តាចម្បងមួយបន្ថែមទៀតដើម្បីជំរុញដល់កិច្ចសហការរបស់វិស័យឯកជនរវាងប្រទេសទាំងពីរ ដែលជាការរួមចំណែកដ៏សំខាន់ក្នុងការអភិវឌ្ឍសេដ្ឋកិច្ច។ នេះបើតាមការលើកឡើងរបស់ លោក អេង ផល្លីម សមាជិកក្រុមប្រឹក្សាភិបាល សមាគមសហគ្រិនវ័យក្មេងកម្ពុជា។

ខណៈទំនាក់ទំនងកម្ពុជា និងជប៉ុនក្នុងវិស័យធុរកិច្ច កំពុងមានការវិវត្តទៅមុខជាលំដាប់ សមាគមសហគ្រិនវ័យក្មេងកម្ពុជា បានសហការជាមួយសមាគមជប៉ុន-កម្ពុជា រៀបចំកិច្ចជំនួបផ្គូផ្គងអាជីវកម្មរវាងសមាជិករបស់សមាគមទាំងពីរ ដោយផ្ដោតសំខាន់ទៅលើអាជីវកម្មក្នុងវិស័យអាទិភាពមួយចំនួន រួមមានកសិកម្ម ឧស្សាហកម្ម ពាណិជ្ជកម្ម បច្ចេកវិទ្យា អចលនទ្រព្យ និងសេវាកម្ម។ កិច្ចជំនួបផ្គូផ្គងអាជីវកម្មនេះ ធ្វើឡើងក្នុងគោលបំណងបង្កើតឱកាសឱ្យសហគ្រិន និងម្ចាស់អាជីវកម្មកម្ពុជា អាចទាញយកប្រយោជន៍តាមរយៈការកសាងទំនាក់ទំនងធុរកិច្ច ផ្លាស់ប្ដូរមតិយោបល់ និងស្វែងរកដៃគូអាជីវកម្មថ្មី៕