ភ្នំពេញ៖ កម្ពុជា-តួកគីយ៉េ ចុះហត្ថលេខាទំនាក់ទំនងទ្វេភាគី និងកិច្ចសហប្រតិបត្តិការលើគ្រប់វិស័យឱ្យកាន់តែស៊ីជម្រៅ តាមរយៈការអនុវត្តសកម្មភាពការងារដូចមានព្រមព្រៀងក្នុងកំណត់ហេតុរួមនៃកិច្ចប្រជុំលើកទី៤ ដែលគ្របដណ្តប់លើវិស័យនិងអនុវិស័យសំខាន់ៗដូចជា៖ ពាណិជ្ជកម្មទំនិញនិងសេវា, កសិកម្ម រុក្ខាប្រមាញ់ និងនេសាទ, អាកាសចរស៊ីវិល, ការដឹកជញ្ជូននិងហេដ្ឋារចនាសម្ព័ន្ធ, អប់រំ, វិនិយោគ, ឧស្សាហកម្ម វិទ្យាសាស្រ្ត និងបច្ចេកវិទ្យា, ហាឡាល, ធនធានទឹក, ទេសចរណ៍, សុខាភិបាល, និង

ការងារ សន្តិសុខសង្គម និងបណ្ដុះបណ្ដាលវិទ្យាជីវៈ។

ជាមួយគ្នានេះ ភាគីទាំងពីរ ក៏បានពិភាក្សាការងារបន្ថែម ដើម្បីពិនិត្យលទ្ធភាពក្នុងការពង្រឹងកិច្ចសហប្រតិបត្តិការពាណិជ្ជកម្ម និងវិនិយោគឱ្យកាន់តែប្រសើរបន្ថែមទៀត ដើម្បីបង្កើនទំហំពាណិជ្ជកម្មទ្វេភាគីឱ្យឈានដល់ ១ប៊ីលានដុល្លារ។ លោកជំទាវ ចម និម្មល រដ្ឋមន្រ្តីក្រសួងពាណិជ្ជកម្មកម្ពុជា ក៏បានសង្កត់ធ្ងន់លើភាពប្រទាក់ក្រឡានិងការផ្ដល់ផលប្រយោជន៍ឱ្យគ្នាទៅវិញទៅមកនៃសេដ្ឋកិច្ចរបស់ប្រទេសទាំងពីរហើយក៏បានជំរុញឱ្យបន្តការធ្វើពាណិជ្ជកម្មនិងវិនិយោគលើផលិតផលកសិកម្ម ការកែឆ្នៃម្ហូបអាហារ វេចខ្ចប់ ទេសចរណ៍សុខាភិបាល និងគ្រឿងបរិក្ខារវិជ្ជសាស្ត្រជាដើម៕