ភ្នំពេញ៖ រយៈពេល ១០ខែ នៃឆ្នាំ២០២៥ កម្ពុជា រកចំណូលបានពីភ្ញៀវទេសចរបរទេស លើការលក់បណ្ណចូលទស្សនារមណីយដ្ឋានអង្គរ ប្រាសាទកោះកែរ និងកំពង់ផែចុងឃ្លៀសសរុបជាង ៣៥,៥៧លានដុល្លារ ថយចុះ ១,១៥% បើធៀបរយៈពេលដូចគ្នាឆ្នាំ២០២៤។ រយៈពេល ១០ខែ ក្នុងឆ្នាំ២០២៥នេះ កម្ពុជាក៏ទទួលបានភ្ញៀវអន្តរជាតិសរុបជាង ៧៦,៥៥ម៉ឺននាក់ ថយចុះ ១,១២% បើធៀបនឹងរយៈពេលដូចគ្នាឆ្នាំ២០២៤។

បើតាមការចុះផ្សាយរបស់គ្រឹះស្ថានអង្គរ ចំណូលលក់បណ្ណនៅប្រាសាទកោះកែររយៈពេល ១០ខែនេះ កម្ពុជាទទួលបានជាង ២៣,៣៧ម៉ឺនដុល្លារ និងទទួលបានចំនួនភ្ញៀវទេសចរបរទេសសរុប ១៥ ៥៨៤នាក់។ រីឯ ចំណូលពីការលក់សំបុត្រទូកវិញ កម្ពុជាទទួលបានចំណូលជាង ១,០៦លានដុល្លារ ក្នុងនោះសេវាឈ្នួលទូកទទួលបាន ៤៧,៥៦ម៉ឺនដុល្លារ។

ចំពោះ ចំណូលពីការលក់សំបុត្រនៅប្រាសាទបេងមាលាក្នុងរយៈពេល ១០ខែវិញ ទទួលបាន ១២,៤៦ម៉ឺនដុល្លារ និងទទួលបានទេសចរអន្តរជាតិចំនួន ១២ ៤៦៧នាក់។ ចំណែក ចំណូលពីការលក់សំបុត្រនៅភ្នំក្បាលស្ពានវិញ ទទួលបាន ៥ ១៥៥ដុល្លារ និងមានភ្ញៀវបរទេសចំនួន ១ ០៣១នាក់៕