ភ្នំពេញ៖ ឯកឧត្តម Francisco P.Tiu Laurel Jr. រដ្ឋមន្រ្តីក្រសួងកសិកម្មហ្វីលីពីន បំពេញទស្សនកិច្ចនៅសហគមន៍កសិកម្មទំនើបបន្លែផ្ទះសំណាញ់ត្រាំកក់ នៅខេត្តតាកែវ និងរោងចក្រកិនស្រូវ និងវេចខ្ចប់អង្ករ របស់ក្រុមហ៊ុន ខ្មែរហ្វ៊ូតគ្រុប ពិនិត្យលទ្ធភាពនាំចូលអង្ករ បន្លែស្លឹក ប៉េងប៉ោះ និងម្ទេសប្លោកពីកម្ពុជា។

ដំណើរទស្សនកិច្ចនៅក្រុមហ៊ុន ខ្មែរហ្វ៊ូតគ្រុប នៅខេត្តកំពង់ស្ពឺនេះ គឺដើម្បីពិនិត្យគុណភាពអង្ករក្រអូបនិងប្រណិតរបស់កម្ពុជា ដូចជាពូជផ្ការំដួល សែនក្រអូប និងស្រង៉ែ ដែលក្រុមហ៊ុនប្រមូលទិញពីសហគមន៍កសិកម្មទំនើបក្នុងតម្លៃខ្ពស់តាមកិច្ចសន្យាផលិតកម្ម ហើយពិភាក្សាលទ្ធភាពបើកទីផ្សារហ្វីលីពីនទទួលនាំចូលអង្ករកម្ពុជា។

ចំណែកដំណើរទស្សនកិច្ចនៅសហគមន៍កសិកម្មទំនើបបន្លែផ្ទះសំណាញ់ត្រាំកក់ នៅខេត្តតាកែវ គឺដើម្បីពិនិត្យការដាំដុះនិងប្រមូលផលបន្លែស្លឹក ប៉េងប៉ោះ និងម្ទេសប្លោក ដែលកំពុងមានតម្រូវការក្នុងទីផ្សារហ្វីលីពីន។ នេះបើតាមការចុះផ្សាយរបស់ ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ នាថ្ងៃទី១០ ខែកញ្ញា ឆ្នាំ២០២៥៕